Në Podujevë premtohen 14 çerdhe të reja

Komunës së Podujevës është premtuar t’i shtohen edhe 14 çerdhe të reja. Në Komunë kanë thënë se bëhet fjalë për 5 objekte të reja dhe 9 adaptime të objekteve aktuale.

Pesë çerdhe të reja do të ndërtohen nga Ministria e Arsimit. Zëdhënësi i Komunës, Fatri Zhitia, ka theksuar se pos këtyre 5 çerdheve MASHTI do t’i hapë edhe 7 çerdhe tjera të cilat do ta adaptohen në objekte shkollore.

“Sivjet është planifikuar ndërtimi i pesë çerdheve nga Ministria e Arsimit, shtatë çerdhe do të adaptohen brenda objekteve shkollore dhe dy të tjera janë investim i Komunës. Këto dyja do të hapen në ish-objektin e QMF-së në Lluzhan dhe në ish-objektin e shkollës ‘Ali Ajeti’ në Sfeçël”, ka thënë Fatri Zhitia.

Zëdhënësi i Komunës së Podujevës ka theksuar se për renovimin dhe adaptimin e këtyre dy objekteve komuna i ka ndarë 50 mijë euro. Kurse për inventarizimin e tyre ka thënë se do të bëhet me një kontratë tjetër.

Zhitia ka deklaruar se dy nga pesë çerdhet që janë investim i MASHTI-t planifikohet të përfundojnë sivjet, ndërsa tri prej tyre janë projekte dyvjeçare.

“Vendet që do të ndërtohen çerdhet e reja nga MASHTI janë: afër parkut të pishave, afër shkollës ‘Xheladin Rekaliu’ dhe në fshatin Batllavë. Ndërsa për ndërtimin edhe të dy çerdheve të reja do të propozohen në Kuvendin Komunal pronat që do të destinohen për ndërtimin e tyre. Ende s’janë përcaktuar pronat për ndërtimin e tyre, por së shpejti kjo do të bëhet dhe do t’i paraqitet kuvendit për miratim”, ka thënë ai.

Ndërtimi i çerdhes afër Parkut të Pishave është premtuar të nisë së shpejti. Aktualisht në qytetin e Podujevës janë dy çerdhe publike.

Qeveria Kurti ka premtuar që deri në fund të mandatit të hapen 160 çerdhe. Në dy vjet mandat, deri tash janë funksionalizuar vetëm katër çerdhe./KOHA net/N.Toverlani/