“Bashkë për LDK-në dhe Llapin”: Unifikim i figurave të rëndësishme në degën e LDK-së në Podujevë

Në prag të zyrtarizimit të kandidatit të Lidhjes Demokratike të Kosovës për kryetar të Komunës së Podujevës, tre figura të njohura të kësaj partie kanë dhënë një sinjal të qartë bashkimi dhe uniteti, njofton PodujevaPRESS.net

Visar Hoti, ish-deputet i LDK-së nga Podujeva, Ekrem Hyseni, kryetar aktual i degës së LDK-së në Podujevë dhe ish-kandidati për kryetar komune si dhe deputet aktual, si dhe Mirsad Kamerolli, kanë publikuar një foto të përbashkët me kryetarin e partisë Lumir Abdixhiku, të shoqëruar me mbishkrimin e njëjtë: “Bashkë për LDK-në dhe Llapin!”

Ky veprim vjen në një kohë kur pritet zyrtarizimi i kandidatit të LDK-së për zgjedhjet lokale në Podujevë, ku burimet brenda partisë konfirmojnë se pritet të jetë Ekrem Hyseni kandidati zyrtar.

Në të kaluarën, Visar Hoti dhe Mirsad Kamerolli kanë shprehur pakënaqësi dhe distancim nga strukturat lokale të partisë, por kjo paraqitje e përbashkët sinjalizon një rikthim të tyre në angazhim aktiv dhe një përpjekje për të hyrë të bashkuar në garën për qeverisjen lokale.

Megjithatë, në foto mungon një tjetër figurë e rëndësishme e LDK-së në Podujevë Agim Veliu, ish-ministër dhe ish-kryetar i komunës. Mungesa e tij ka nxitur reagime nga mbështetësit dhe bashkëpunëtorët e tij, të cilët kanë komentuar kritikisht në rrjetet sociale, duke ngritur pyetje për anashkalimin e Veliut në këtë proces.

Mbetet të shihet se si do të zhvillohet dinamika e brendshme e LDK-së në ditët në vijim, por sinjali i bashkimit nga disa prej figurave kyçe duket se ka për qëllim të tregojë forcën dhe gatishmërinë e partisë për garën zgjedhore që po afron.