Podujeva ndërton ura bashkëpunimi me qytetin Ames në SHBA

Në takimin e parë zyrtar në Shtetet e Bashkuara të Amerikës, delegacioni i Komunës së Podujevës u prit nga Kryetari i qytetit Ames në Iowa, z. John Haila, i cili ishte i shoqëruar nga bashkëpunëtorja e tij, znj. Karla McCollum, si dhe nga përfaqësuesit e Konsullatës së Kosovës në Iowa, z. Drilon Zogaj dhe z. Fatmir Rrahmanaj.

Gjatë këtij takimi miqësor, palët diskutuan mundësitë për krijimin e urave të bashkëpunimit në fusha të ndryshme si ekonomia, bujqësia, arsimi dhe nxitja e lidhjeve ndërmjet bizneseve të të dy qyteteve.

Të dyja palët u dakorduan për thellimin e bashkëpunimit, me synimin që së shpejti të nisin projektet e para konkrete. Gjatë vizitës së ardhshme të delegacionit nga Ames në Podujevë, pritet që të formalizohet edhe marrëveshja për binjakëzimin e dy qyteteve.

Kjo nismë përfaqëson një hap të rëndësishëm në drejtim të ndërkombëtarizimit të Podujevës dhe hapjes së saj drejt mundësive të reja zhvillimore përmes partneriteteve të qëndrueshme ndërkombëtare.

“Ky është vetëm fillimi i një partneriteti të rëndësishëm për qytetin tonë,” u theksua gjatë takimit.