Shpejtim Bulliqi: Komisioni i krijuar nga Isa Mustafa është politik e jo profesional

Mbrëm në emisionin ‘Përballje’ të transmetuar në RTV Dukagjini është diskutuar për çështjen e kufirit me Malin e Zi dhe për krijimin e komisionit të ri për matjen e territorit të Kosovës.

Deputeti i LDK-së, njëherësh profesor i gjeografisë dhe njëri nga kundërshtuesit kryesorë të marrëveshjes aktuale të kufirit me Malin e Zi, Shpejtim Bulliqi ka thënë se komisioni i emëruar nga kryeministri Isa Mustafa është politik e jo profesional.

Bulliqi ka deklaruar se ai nuk kishte ftesë për takimin e komisionit të ri.

“Ne nuk kemi pas ftesë që të jemi pjesë e këtij komisioni, por edhe sikur të kishim pas ftesë, nuk do të shkoja”, ka deklaruar Bulliqi në emisionin ‘Përballje’.

Sipas tij, në këtë komision që është formuar mund të jenë dy ekspertë të cilët marrin vesh në çështjen e problematikës së kufirit.

“Ky komision është ekskluzivisht komision politik dhe aspak nuk është komision profesional e as komision i ekspertëve sepse nuk është larg kohë që po i njëjti njeri i cili është fut në krye të këtij komisioni është deklaruar publikisht pro marrëveshjes aktuale për kufirin”, ka potencuar Bulliqi.