Shala: AKI ka agjentë në krejt vendin, edhe në veri

Kryetari i komisionit për Agjencinë e Kosovës për Inteligjencë, Haxhi Shala, ka thënë se zbulimi kosovar ka qasje në të gjithë territorin e vendit, përfshirë edhe veriun.

Ai ka deklaruar se lëvizjet e xhandarmërisë serbe brenda territorit të Serbisë nuk duhet të konsiderohen shqetësuese, sepse janë thjesht tentativë e shtetit fqinj për të provokuar konflikt.

“AKI ka qasje në të gjithë territorin e Kosovës. Neve nuk duhet të na shqetësojnë lëvizjet e xhandarmërisë serbe në territor të Serbisë. Dezinformatat të cilat i bën Serbia nuk duhet t’i pranojmë për të besueshme. Serbia cdoherë është e mësuar të lëshojë dezinformata dhe të shohë se sa bien qytetarët dhe institucionet. E rëndësishme të dihet është që protesta e sotme e qytetarëve serbë në veri të Kosovës është e koordinuar me Qeverinë e Serbisë”.

Shala më tutje në Info Magazine ka thënë se muri mund të jetë pasojë e mostransparencës së institucioneve të Kosovës për marrëveshjet e Brukselit.

“E kam ndjekur me vëmendje situatën cfarë po ndodh në veri të Kosovës. Deri tani nuk është respektuar rezoluta e Kuvendit të Kosovës, megjithëse për datat qenë pajtuar edhe shefat e grupeve parlamentare të dy partive më të mëdha në vend. Bisedimet e Brukselit janë krejt jotransparente. Kështu Serbia bën lojëra, si sot, duke grumbulluar qytetarë në protesta tek muri. Por ne duhet të jemi të përgatitur që këtyre taktikave t’u përgjigjemi me taktikat tona. Kur qe ndërtuar muri, institucionet patën thënë se ai do të rrënohet sepse nuk është asgjë. Por tani është politizuar aq shumë sa nuk mund të rrënohet lehtë”.