Sërish vërshime në Podujevë

Reshjet e shiut që kanë filluar nga mbrëmja e së mërkurës dhe kanë vazhduar edhe gjatë ditës së enjte kanë rikthyer vërshimet në Komunën e Podujevës. Zyrtarët komunalë i kanë thënë KOHË-s se më së keqi janë lagjet “Shala” e “Tovërlani” në periferi të qytetit.

Zëdhënësi Fatri Zhitia thotë se gjendja nuk është e mirë as në fshatrat Sfeçël e Lluga.

“Situata që është pak më e rënduar është lagjja ‘Tovërlani’, ku zakonisht po kemi probleme. Ne e kemi bërë zgjerimin e gypit i qarkullimit të përrsokës po prapë ka probleme. Ekipi ka shkuar aty për të bërë zgjerimin e fytit të asaj përroske ku kalon uji. Edhe në Sfeçël ka filluar të dalë uji jashtë shtrati dhe veç sa shkuan ekipi i komunës dhe po ashtu kompania që është e kontraktuar nga Komuna për këto çështje dhe do të shohin se çfarë mund të bëjnë për të intervenuar”, ka theksuar Fatri Zhitia.

Zëdhënësi i Komunës së Podujevës ka thënë se edhe në Lluga nuk është situata mirë.

“Tash për tash nuk ka të përmbytur dhe nuk ka nevojë për evakuim të banorëve. Zakonisht më herët kemi pas probleme në fshatin Sibofc dhe Bellopojë. Por, aty kemi intervenuar para një muaj dite ku është bërë zgjerimi i shtretërve të lumnjëve dhe ende banorët nuk ka na kanë njoftuar se ka vërshime”, ka thënë Zhitia.

Sipas tij, për shkak se ka reshje me intensitet të shtuar ka rrezik që vërshimet do të përfshijnë edhe zona tjera të Podujevës./Nexhat Toverlani/