Rruga Prishtinë – Podujevë, banorët ende pa vendim për shpronësim, thonë se s’do t’i lejojnë punimet

Është bërë përurimi i fillimit të punimeve të rrugës Prishtinë – Podujevë. Kryeministri Kurti tha se ngecja për përfundimin e rrugës ka ekzistuar për shkak të mosplanifikimit të punimeve. E disa banorë që janë të prekur nga shpronësimet e kësaj rruge thonë se kanë marrë njoftim para dy muajve për shpronësim të pronave të tyre, por jo edhe vendimin.
Ishte premtuar që rruga Prishtinë – Podujevë të përfundonte vitin e kaluar, por tek të hënën u bë inaugurimi i fillimit të punimeve për të cilën banorë të kësaj ane thonë se ende nuk kanë marrë vendimin për shpronësim të pronave të tyre.

Selatin Bllaca nga fshati Bërnicë e Epërme thotë se kanë marrë njoftim para dy muajve për shpronësim të pronave të tyre, por jo edhe vendimin.

E derisa nuk kanë vendimin, ata janë shprehur se nuk do të lejojnë punimet.

“Mu vendim nuk më ka ardhë as për shpronësim, as për kurrgjë hiç, rruga ka fillu me u rregullu pika nuk më kanë vendos unë nuk e di se çka shpronëson, a çka është në pyetje. Më kanë bërë një shpronësim P+0, unë nuk di asnjë arkitekt as një inxhinier që më ka thënë që ka një plan P+0. Unë e kam shtëpinë me leje ndërtimi para lufte. Unë nuk po kuptoj çka është kjo punë, mu pa më vlerësu nuk mujnë me mi qit pikat, unë nuk pranoj”, ka theksuar Bllaca.

E një banor tjetër konsideron se është e padrejtë të fillohen punimet pa e parë vlerën që ju është caktuar për shpronësim.

“Prej Ministrisë na kanë ardhë vetëm letrat e shpronësimit, pagesë as kurgjë hala nuk na ka ardhë, se di as sa e paguajnë e diku rreth 60 metra katror na kanë ardhë letrat që kanë me u shpronësu”, ka theksuar banori Xhelil Hajdini.

KOHA ka dërguar pyetje në Ministrinë e Mjedisit, Planifikimit Hapësinor dhe Infrastrukturës në lidhje me ankesat e banorëve gjatë së hënës, por nuk ka marrë përgjigje.

Por në fillimin e punimeve, ministri i Infrastrukturës, Liburn Aliu, u shpreh se ka një sistem më të organizuar për zhvillimin e punimeve. E tregoi edhe për përvojat nga e kaluara me shpronësime.

“Jemi në një mënyrë, në një sistem më të organizuar të zhvillimit dhe punimit. Përvojat nga e kaluara na kanë treguar që është shumë e rëndësishme që proceset e shpronësimit të kryhen para se të fillojnë punët, për shkak se një ndër element e zvarritjeve në projekte janë elemente e shpronësimit”, theksoi Aliu.

Ngecjen e përfundimit të kësaj rruge e ka arsyetuar kryeministri Albin Kurti, i cili ka thënë shkak u bë mosplanifikimi i duhur.

Shtoi se tash e tutje do të punohet me shpejtësi dhe përfundimi saj do bëhet brenda një viti.

“Rruga Prishtinë-Podujevë është e vjetër gjysmë shekulli dhe ka qenë nevojë e kahmotshme e trevës së Llapit që të lidhet me kryeqytetin në mënyrë efikase të shpejtë dhe të sigurt dhe do të bëjmë çmos që kjo rrugë të përfundoj sa më parë”, ka theksuar Kurti.

Projekti i zgjerimit të rrugës Prishtinë – Podujevë ka nisur gjashtë vjet më parë, por ka dështuar të finalizohet.

15 km është gjatësia e kësaj rruge e cila ka filluar të zgjerohet, ndërsa do të kushtojë 35 milionë euro.