Rakiq nesër vjen në Prishtinë, tregon se kur do ta rrënojë murin në Mitrovicë

Kryetari i Mitrovicës së Veriut, Goran Rakiq ka thënë sonte pas takimit në Rashkë dhe pas deklaratës për media me kryeministrin serb, Aleksandar Vuçiq, se kryeministri serb ka kërkuar nga ata që të jenë të qetë, të bashkuar dhe mos të ndërmarrin hapa të njëanshëm.

“Nga kryeministri kemi kërkuar që fuqinë e tij ta përdor për t’i mbrojtur serbët në Kosovë, në veri por edhe në jug të Ibrit”, ka thënë ai, transmeton lajmi.net.

Ai ka thënë se serbët në veri frikësohen që Prishtina me ndihmën e ROSU-së do të ndërmarrin aksion për rrënimin e murit në veri.

“Nuk e di a ka ndonjë vend në botë që policia merret me ndërtim pa leje, siç e quajnë ata murin. Revitalizimi i urës është marrëveshje nga Brukseli. Nëse dëshironi t’i respektoni ligjet e Kosovës, atëherë ai mur është në ingirenca të Mitrovicës veriore”, ka thënë ai.

Rakiq ka thënë se nesër në Prishtinë do të takohet me përfaqësuesit e institucioneve të Kosovës me ndërmjetësim të BE-së lidhur me murin.

“Nuk pres asgjë nga Prishtina, sepse vetëm luan që nga 8 dhjetori kur kemi arritur marrëveshje. Më pas e hodhën atë në ujë dhe kërkojnë rrënimin e murit. Nëse ROSU vjen për të rrënuar murin, askush nuk mund të jep siguri se si do të jenë reagime”, ka thënë ai. /Lajmi.net/