Qytetarë të Podujevës qe 3 javë përballen me furnizim jocilësor të ujit

Disa pjesë të qytetit të Podujevës ka tri javë që përballen me shtypje të dobët të ujit. Shkak janë bërë punimet në rrjetin e ujësjellësit në rrugën “Skënderbeu”. Zëdhënësja e Kompanisë Rajonale të Ujësjellësit (KRU) “Prishtina”, Arjeta Mjeku, i ka thënë KOHËS se rezervarët me ujë janë në kuotën maksimale, porse kjo po ndodh për shkak të punimeve në rrjet që është duke i bërë kompania e kontraktuar nga Komuna.

“E vërteta se në Komunën e Podujevës qe 2 apo 3 javë mund të kenë shtypje të ulët të ujit, nuk vjen nga ana jonë, sepse rezervarët i kemi në nivele maksimale, por kontraktori i komunës atje është duke e rehabilituar rrjetin me punime teknike dhe kyçje të reja, projekti i rrugës ‘Skenderbeu’, andaj duke punuar teknikisht mund ta ndalin ujin derisa të realizojnë kyçje dhe shtypja e ulët e ujit reflekton menjëherë”, ka thënë Arjeta Mjeku.

Sipas saj, reduktime të ujit vetëm sot ka lagjja “Arbëria” dhe lagjja “Kodra e Trimave”, si dhe disa fshatra Albanik- Podujevë, për shkak të turbullirës së ujit në kanalin e Ibrit.

“Kemi gjetur disa alternativa për furnizim që asnjë konsumator të mos preket gjatë për mungesë furnizimi me ujë”, ka thënë ajo.

Edhe zëdhënësi i Komunës së Podujevës, Fatri Zhitia, ka theksuar se telashet me ujë janë për shkak të punimeve në rrugën “Skënderbeu”.

“Ndërrimi i gypave të vjetër ekzistues të ujësjellësit me instalimin e gypave të ri ka bërë që të ketë ndërprerje të kohëpaskohshme të ujit në lagjet në rrugën ‘Skënderbeu’ dhe përreth saj. Ne jemi të njoftuar nga kompania punëkryerëse për këto ndërprerje dhe jemi në komunikim të vazhdueshëm me kompaninë që sa më shpejt të përfundojnë punimet dhe të mënjanohen ndalesat e tilla. Andaj për këto ndërprerje të ujit kërkojmë mirëkuptimin e qytetarëve”, ka thënë ai./KOHA net/N.Toverlani/