Qendra për Punë Sociale në Podujevë qe katër vjet me ushtrues detyre të drejtorit

Qendra për Punë Sociale në Podujevë vazhdon të udhëhiqet nga ushtrues detyre qe katër vjet. Tri konkurse deri tash kanë dështuar për ta zëvendësuar ish-drejtorin e këtij institucioni, i cili ishte pensionuar në vitin 2019. Zyrtarët komunalë thonë se këto ditë do të shpallin konkursin e ri. Ndërkaq, në shoqërinë civile vlerësuan se mungesa e drejtorit shkakton vakum institucional dhe mungesë në vendimmarrje

Tri konkurse kanë dështuar për katër vjet për zgjedhjen e drejtorit të Qendrës për Punë Sociale në Komunën e Podujevës. Zyrtarët komunalë nuk kanë arritur ta zgjedhin zëvendësuesin e ish-drejtorin e këtij institucioni, i cili ishte pensionuar në mars të vitit 2019.

“Gjatë kësaj periudhe që nga përfundimi i mandatit të drejtorit të mëhershëm janë shpallur tre konkurse me radhë, ndër vite, për të cilat nuk janë plotësuar kushtet dhe kriteret e kërkuara në konkurs për t’u zgjedhur drejtori i ri i Qendrës për Punë Sociale në Podujevë. Herën e fundit kur është shpallur ky konkurs nuk ka pasur asnjë aplikant i cili i ka plotësuar kriteret për të vazhduar më tutje as për t’u intervistuar, apo për t’iu nënshtruar testit me shkrim”, ka thënë zëdhënësi i Komunës së Podujevës, Fatri Zhitia.

Përkundër kësaj, zëdhënësi Zhitia thekson se i është ofruar mbështetje këtij institucioni, në mënyrë që t’i kryejë detyrat dhe përgjegjësitë që i takojnë.

“Po, përkundër të gjitha vështirësive që i ka pasur kjo Qendër edhe si institucion i komunës jemi munduar, jemi angazhuar që t’i ofrojmë mbështetje këtij institucioni për t’i kryer detyrat dhe përgjegjësitë që i takojnë”, ka thënë ai.

Në anën tjetër, përfaqësues të shoqërisë civile konsiderojnë se Komuna ka shpallur pak konkurse për katër vjet për të bërë Qendrën për Punë Sociale me drejtor.

“Padyshim se mungesa e pozitës së drejtorit në secilin institucion krijon vakume të ndryshme dhe mungesë në vendimmarrje, po ashtu edhe në planet afatgjate të atij institucioni. Pra në Komunën e Podujevës QPS-ja ka mbetur pa drejtor qe katër vjet. Vërehet që ka mungesë edhe të shpalljes së konkursit për pozitën e drejtorit”, ka theksuar drejtori ekzekutiv i OHQ “Sundimi i Demokracisë në Kosovë”, Rexhep Zeka.

Zëdhënësi i Komunës së Podujevës ka thënë se këto ditë do të shpallet konkursi i ri.

“Tash janë bërë të gjitha përgatitjet dhe brenda kësaj jave do të shpallet konkursi i ri për të zgjedhur drejtorin e ri të Qendrës për Punë Sociale, përkundër që ushtruesi i detyrës së drejtorit është duke i kryer detyrat dhe përgjegjësitë që i takojnë drejtorit të këtij institucioni”, ka deklaruar zëdhënësi Zhitia.

Ndërkohë, Rexhep Zeka ka kërkuar nga komunarët që para se ta bëjnë këtë të evitohen telashet e konkurseve të mëparshme, në mënyrë që të mos dështojë edhe konkursi i ri./KOHA net/N.Toverlani/