PODUJEVË: Motokultivatorët “politikë”

Vitin e kaluar pushteti i LDK-së i kishte nisur procedurat e prokurimit për blerjen e 100 motokultivatorëve si subvencion për fermerë. Lista e përfituesve ishte publikuar në muajin tetor, para se të përfundonin procedurat e prokurimit. Qeveria e LVV-së e ka anuluar këtë tender, pasi atë Organi Shqyrtues i Prokurimit e ka kthyer dy herë mbrapsht për shkak të operatorëve të papërgjegjshëm. E ky vendim po kundërshtohet nga LDK-ja

Me akuza e kundërakuza është përcjellë anulimi i tenderit për blerjen e motokultivatorëve për fermerë në Komunën e Podujevës.

Ky projekt që kishte nisur në kohën sa qeveriste LDK-ja është kthyer dy herë prapa nga Organi Shqyrtues i Prokurimit, pasi ai kishte vlerësuar se operatorët ekonomikë ishin të papërgjegjshëm. Por javën që shkoi pushteti i LVV-së e ka anuluar këtë procedurë të prokurimit, pasi i njëjti është arsyetuar se sivjet nuk është paraparë buxhet për një projekt të tillë.

“Projekti është iniciuar në vitin e kaluar nga qeverisja e kaluar. Janë paraqitur dy ofertues dhe dy operatorët kanë qenë të papërgjegjshëm gjatë vlerësimit. Përsëri është shpallur tenderi i këtij projekti, përsëri OSHP-ja e ka kthyer si të papërgjegjshëm për të dy tenderët. Andaj ne si Komunë, si Autoritet Kontraktues, jemi të obliguar ta zbatojmë vendimin e OSHP-së. Pra, ky projekt është dashur të finalizohej dhe të implementohej vitin e kaluar”, ka thënë drejtori për Bujqësi, Pylltari dhe Zhvillim Rural, Vigan Salihu.

Sipas tij, me buxhetin e këtij viti nuk kanë ndonjë projekt të specifikuar për motokultivatorë. Ndërsa ish-drejtori i këtij dikasteri nga radhët e LDK-së, Vezir Januzi, ka thënë se tenderi nuk do të duhej të anulohej, por të rishpallej sërish. Sipas tij, Qeveria e tanishme nuk duhet të realizojë asnjë projekt në bujqësi, para se të përfundojë blerja e motokultivatorëve.

“Arsyeja e reagimit është se vendimi i anulimit është i pabazë dhe i padrejtë, sepse fermerët i kanë paguar taksat e tyre, kanë aplikuar në afatin të cilin ne e kemi shpallur dhe i kanë plotësuar të gjitha kërkesat dhe kriteret të cilat ne i kemi parashtruar në konkurs. Kështu që komisioni ka vendosur drejt, pa ngjyra politike. Kemi përfitues nga të gjitha fshatrat dhe qyteti po në fushën e pemëtarisë dhe perimkulturës dhe mendoj që është e padrejtë. Kërkoj që të gjithë fermerët të kërkojnë të drejtën ligjore, çdo rrugë ligjore ta ndjekin, për ta përfituar të drejtën e tyre që iu takon”, ka theksuar Januzi.

Por Salihu thotë se qeveria e LDK-së është ngutur me përzgjedhjen e përfituesve, pa përfunduar procedurat e prokurimit. Sipas tij, kjo është bërë me qëllim fushate elektorale, pasi lista ishte publikuar një muaj para se të mbaheshin zgjedhjet e jashtëzakonshme për kryetar të Komunës së Podujevës.

“Zgjedhja e përfituesve pa e zgjedhur një operator të përgjegjshëm, i cili do t’i furnizonte fermerët me motokultivatorë kualitativë, është realisht një ngutje e tyre. Ngutja e tyre që sigurisht ka qenë kalkulim për vota për të dalë më mirë në zgjedhje, sigurisht që i ka pru fermerët edhe në një pozicion të tillë. Mirëpo, unë mendoj se edhe fermerët janë të vetëdijshëm për këtë çështje”, ka thënë drejtori Salihu.

Këtë e ka mohuar ish-drejtori Vezir Januzi. Sipas tij, çështja e prokurimit dhe e komisionit për përzgjedhjen e përfituesve janë të ndara njëra nga tjetra.

“Nuk mendoj që jemi ngutur dhe nuk ka pasur indikacione politike për arsye se Drejtoria e Bujqësisë dhe çdo dikaster në Komunën e Podujevës në fund të vitit kalendarik bën planifikim e prokurimit për me i zhvilluar projektet, për çdo vit kalendarik. Dhe ne i kemi pasur planet e prokurimit dhe i kemi bërë. Ky projekt ka qenë i planifikuar po në këtë kohë, në fund të muajit gusht-shtator të iniciohen procedurat e prokurimit dhe ne kemi menduar që kanë ecur procedurat e prokurimit, komisioni ka vendosur detyrën e vet që ta bëjë shpalljen publike të listës përfituese për 100 fermerë për këta motokultivatorë”, është shprehur Januzi.

Në këtë projekt parashihej të bliheshin 100 motokultivatorë, ndërkohë që fermerët përfitues do të participonin me 30 për qind të shumës. Në mëngjesin e së martës një numër i vogël i fermerëve përfitues kanë protestuar para objektit komunal për të kundërshtuar anulimin e tenderit. Po të martën KOHA i ka kontaktuar disa nga ta, por nuk kanë shprehur gatishmëri të deklarohen. Komuna e Podujevës edhe në vitin 2019 i kishte blerë 100 motokultivatorë për fermerë, por drejtori Vigan Salihu thotë se të njëjtit kanë mbetur të pashfrytëzuar për shkak të cilësisë së dobët.

“Fermerët po besoj që s’kanë harruar që edhe para 2-3 vjetëve ka qenë një furnizim me motokultivatorë nga po kjo qeverisje që sot po ankohet dhe ata kultivatorë janë nëpër depot e tyre (fermerëve v.j.), nuk janë duke i shfrytëzuar për shkak që nuk janë kualitativë. Andaj mendoj dhe e shoh të natyrshme që një gjë e tillë nuk duhet përsëritur”.

Në gjë të tillë e ka mohuar paraadhësi i tij Vezir Januzi.

“Ne si drejtorë nuk vendosim për cilësinë e pajisjeve. Është Komisioni, është operatori që i ofron mundësinë dhe komisioni e bën vlerësimin e atyre se a janë ato pajisje në bazë të kërkesave dhe procedurave që ne i kemi kërkuar në bazë të atyre specifikave. Përndryshe ne sa kemi qenë drejtorë për 11 vjet, jo vetëm për motokultivatorë, por edhe për pajisje tjera nuk kemi pasur asnjëherë vërejtje dhe ndonjë ankesë, besoj mund të shikoni nëse ka ndonjë ankesë për këta motokultivatorë”, ka thënë Januzi.