SBAShK: Nëse kërkesat nuk plotësohen nga Ministria e Arsimit, fillojmë me veprime

Podujevë: Drejtori Ekzekutiv i AMMKM inspekton projektet për ruajtjen e trashëgimisë së luftës çlirimtare
Drejtori Ekzekutiv i Agjencisë për Menaxhimin e Monumenteve dhe Kompleksëve Memorialë (AMMKM), z. Imer Hakaj, ka realizuar sot një vizitë pune në Komunën e Podujevës, ku aktualisht po zhvillohen punimet për tri projekte kyçe që synojnë ruajtjen dhe promovimin e trashëgimisë së lavdishme të luftës çlirimtare.
Projektet përfshijnë:
Faza përfundimtare e rregullimit dhe muzealizimit të Kompleksit Memorial të Dëshmorëve të UÇK-së në fshatin Punuhë, një vend simbolik që ruan kujtesën e atyre që dhanë jetën për lirinë e Kosovës;
Muzealizimi i Shtëpisë Bazë të UÇK-së në fshatin Halabak, një objekt me vlerë historike që do të shndërrohet në qendër edukimi dhe dokumentimi për të rinjtë dhe brezat e ardhshëm;
Rivitalizimi i projektit “Beteja e Tabeve të Llapashticës”, që do të përkujtojë një nga betejat e rëndësishme në zonën e Llapit gjatë luftës.
Gjatë vizitës, z. Hakaj u shpreh se ndihet i privilegjuar për besimin që i është dhënë në udhëheqjen e këtyre projekteve të një rëndësie të jashtëzakonshme për identitetin dhe historinë kombëtare. Ai vlerësoi lartë kontributin e shoqatave të dala nga lufta, të cilat, sipas tij, kanë qenë partnere të denja dhe shumë aktive në çdo iniciativë të përbashkët me AMMKM.
“Respekti për familjet e dëshmorëve, invalidët dhe veteranët e luftës është udhërrëfyesi ynë. Ne do të vazhdojmë me përkushtim të zbatojmë çdo projekt të planit vjetor për vitin 2025, duke garantuar cilësi, profesionalizëm dhe ndjeshmëri institucionale,” theksoi drejtori Hakaj.
Ai gjithashtu falënderoi Komunën e Podujevës për bashkëpunimin e ngushtë dhe mbështetjen teknike në realizimin e këtyre projekteve, duke theksuar se punët e mira bëhen vetëm me përfshirjen e të gjithë akterëve të përkushtuar.
AMMKM ka konfirmuar se do të vazhdojë pandërprerë me implementimin e projekteve në të gjitha komunat e Republikës së Kosovës, me synimin për të përmbyllur me sukses të gjitha ndërhyrjet që nderojnë dhe ruajnë trashëgiminë më të shenjtë të popullit tonë – luftën për liri.







