Sekuestrohen mbi 100 mijë euro para të padeklaruara në pikën kufitare Merdare

Policia Kufitare e Kosovës ka sekuestruar mbi 119 mijë euro para të padeklaruara, gjatë një kontrolli të thelluar në pikën kufitare të Merdares, mbrëmjen e së mërkurës, më 3 korrik 2025, rreth orës 21:30.

Sipas njoftimit zyrtar, zyrtarët policorë kufitarë dhe ata doganorë kanë ndalur për kontroll një automjet me targa të Serbisë, në të cilin udhëtonin dy shtetas serbë, njëri si shofer dhe tjetri si pasagjer. Fillimisht, pasagjeri kishte deklaruar se posedonte 18,000 euro me vete.

Megjithatë, pas kontrollit të detajuar në linjën e dytë të kontrollit, në bashkëpunim me Doganën e Kosovës, janë zbuluar shuma të konsiderueshme të parave në vende të ndryshme të automjetit, përfshirë:

në trupin e shoferit,

në një çantë në ulësen e pasme,

poshtë ulëses së pasagjerit,

si dhe në kulmin e automjetit (panoramën lëvizëse).

Në total, janë zbuluar dhe sekuestruar 119,180 euro, në kartëmonedha të prerjeve të ndryshme (10€, 20€, 50€, 100€ dhe 200€), të cilat nuk ishin deklaruar sipas rregullave në fuqi për kalimin e kufirit me mjete monetare.

Të gjitha këto para janë sekuestruar përkohësisht dhe janë dorëzuar zyrtarëve doganorë për trajtim të mëtejshëm ligjor dhe hetim.

Zyrtarët kufitarë dhe ata doganorë po vazhdojnë hetimet në lidhje me rastin, ndërsa autoritetet kanë bërë të ditur se veprime të tilla janë pjesë e masave të shtuara për parandalimin e krimit financiar dhe të kontrabandës me para.