Gara nxehet në Podujevë: Rikthehet përballja Bulliqi-Hyseni? Çfarë roli do të ketë Agim Veliu dhe ku është PDK?

Me zyrtarizimin e disa kandidaturave për zgjedhjet lokale të këtij viti, gara për kryetar të Komunës së Podujevës pritet të jetë një ndër më të nxehtat në Kosovë.

Deri më tani, kandidatët e konfirmuar janë:

Shpejtim Bulliqi (LVV) – aktualisht kryetar komune dhe kandidat për rizgjedhje;

Ekrem Hyseni (LDK) – kandidati i sapo zyrtarizuar me përkrahje të gjerë nga strukturat e partisë;

Baki Feta (AAK) – kandidati që përfaqëson partinë e Ramush Haradinajt në Podujevë;

PDK – ende pa kandidat zyrtar, por pritet të vendosë së shpejti.

Kujtojmë se në zgjedhjet e fundit lokale, beteja për Podujevën u vendos në balotazh mes Bulliqit dhe Hysenit, ku një mbështetje e heshtur dhe vendimtare nga struktura të caktuara të PDK-së bëri që Bulliqi të triumfojë me një diferencë prej vetëm rreth 2000 votash.

A do të përsëritet historia apo do të ndryshojë loja?

Situata aktuale në qytet paraqitet komplekse. Podujeva po përballet me sfida të mëdha sociale dhe ekonomike: zbrazja e qytetit nga të rinjtë, papunësia në rritje, projekti i bllokuar i rrugës Podujevë-Prishtinë, e cila megjithëse është mbi 70% e përfunduar, mbetet ende jashtë funksionit të plotë.

Ndërtimi i banesave ka shpërthyer, por shitjet janë të dobëta, një indikator i qartë i stagnimit ekonomik dhe pasigurisë për të ardhmen.

Akuza, hetime dhe tensione brenda partive

Kryetari aktual, Shpejtim Bulliqi, ndodhet nën akuza të vazhdueshme për keqmenaxhim dhe korrupsion. Edhe pse ndaj tij janë zhvilluar hetime të shumta nga njësitet e Krimeve Ekonomike, deri më sot nuk është ngritur asnjë aktakuzë zyrtare.

Ndërkohë, edhe partitë më të vogla opozitare po përballen me kriza të brendshme, çka mund t’i lërë jashtë loje në garën reale për pushtetin lokal.

Por ajo që ka nxitur më shumë diskutime është “fërkimi i vjetër” mes Agim Veliut dhe Ekrem Hysenit, të dy nga LDK. Kujtojmë që në zgjedhjet e kaluara lokale, Hyseni ka akuzuar haptazi Veliun se ka punuar në dëm të tij, një përçarje që, nëse nuk menaxhohet mirë, mund të ndikojë seriozisht në shanset e LDK-së për të rikthyer pushtetin në komunë.

Çfarë pritet?

Pyetja që shtrohet tani është:

A do të përsëritet përballja Bulliqi-Hyseni?

A do të ndërhyjë PDK me një kandidat serioz apo do të rrijë në rolin e “balancuesit”?

 A do të mundet LDK të bashkohet përballë VV-së dhe të shmangë sabotimet e brendshme?

E ardhmja mbetet për t’u parë, por një gjë është e sigurt: Podujeva do të jetë një nga fushëbetejat më interesante politike në zgjedhjet lokale të këtij viti që do të mbahen më 12 tetor 2025./PodujevaPRESS.net