Podujeva me reduktime të ujit| Ja çfarë kërkojnë nga llapjanët zyrtarët e KRU “Prishtina”

Zëdhënësja e Kompanisë Rajonale të Ujësjellësit “Prishtina”, Arjeta Mjeku, ka bërë të ditur se reduktimet e ujit të pijshëm kanë nisur në qytetin e Podujevës dhe në disa lagje të Prishtinë.

Kjo sipas saj po ndodh për shkak të keqpërdorimeve të mëdha të ujit të pijes dhe fillimit të rënies së nivelit të ujit në liqenet akumuluese.

Mjeku ka kërkuar nga konsumatorët që ujin e pijes ta përdorin racionalisht, në mënyrë që shpërndarja e ujit të bëhet barabartë për secilin konsumatorë. 

“Po shihet tash që kemi temperatura të larta mbi vendin tonë, andaj ne këto ditë kemi apeluar dhe vazhdojmë të apelojmë për shpenzim racional të ujit të pijshëm. Ujin duhet ta shpenzojmë për nevoja shtëpiake, për pije dhe higjienë dhe assesi për destinime tjera që vërtetë janë të paarsyeshme. Andaj lusim të gjithë qytetarët në mënyrë që shpërndarja e ujit të bëhet në mënyrë të barabartë për secilin konsumatorë, qoftë edhe për ata që jetojnë mbi kuotat rezervarëve secili prej nesh duhet të vetëdijesohemi njëherë e përgjithmonë që ujin ta shpenzojmë sa më racional”, ka thënë Mjeku.

Aktualisht, në tri liqenet akumuluese, niveli i ujit ka rënë 15 metra nën kuotën maksimale të kapërderdhjes, me ç’rast ka bërë që të fillohet me reduktime të ujit.

“Me më impiantet e trajtimit të ujit në Albanik, Shkabaj dhe Badoc, jemi duke punuar me kapacitete maksimale, nivelet e ujit në liqenet akumuluese i kemi të kënaqshëm, kanë rënë afër 15 metra nën kuotën maksimale të kapërderdhjes. Edhe pse jemi duke punuar me kapacitete maksimale, në disa zona kemi filluar me aplikim të reduktimit të ujit, për shkak që uji po keqpërdoret, për shkak të rritjes enorme të kërkesave për ujë të pijshëm dhe me reduktim të ujit nga dita e djeshme është qyteti i Podujevës, si dhe Lagja ‘Nic’, lagja ‘Qëndresa’ e të gjitha lagjet që përfshihen nga zona e Veternikut e deri në Çagallavicë, janë me reduktime të ujit”, u shpreh Mjeku për EO.