Podujeva për këtë fundvit po i gëzohet festave, madje bashkatdhetarët e kanë gjallëruar gjithë qytetin, kjo vërehet nëpër rrugë nga prania e veturave me tabela të shteteve të BE-së, restorante dhe në dyqane e markete ku radhët për pagesa janë të gjata. Kjo lumturi vërehet edhe në fytyrat e shitësve ambulant, te cilët po realizojnë shitje më të larta.
Festat gjithandej botës shërbejnë edhe si urë për lidhjen dhe forcimin e dashurisë dhe harmonisë në familje dhe shoqërisë në përgjithësi. Të tilla janë edhe tek ne, madje me një dozë edhe me të fortë të lidhjes për shkak të traditave dhe zakoneve tona, ku prindërit dhe familja e gjerë në përgjithësi janë ndër faktorët me të fortë social.
Sipas të dhënave të cilat priten të bëhen zyrtare ditëve në vijim nga zyrtarët kufitar, për këtë fundvit në pikëkalimin kufitar në Merdare, në Kosovë kanë hyrë me mijëra bashkatdhetar, ku nga ky numër përllogariten që rreth 10 mijë të jenë nga Podujeva. Pa dyshim kjo ardhje do të jetë edhe një infuzion për ekonominë lokale, pasi që remitencat llogariten si e hyra e dytë më e lart pas buxhetit shtetëror. /PodujevaPRESS/
