Opozita në Podujevë e bën për 5 pare pushtetin, ndërsa Nexhmi Rudari e quan fushatë (VIDEO)

Edhe një muaj, qytetarët e Podujevës do t’i nënshtrohen procesit zgjedhor të jashtëzakonshëm për kryetar të komunës së tyre.

Por, deri më 29 nëntor, kur edhe i kanë zgjedhjet për të zotin e shtëpisë, asamblistët opozitarë në Kuvendin Komunal të Podujevës e shfrytëzuan edhe një seancë që ta kritikojnë qeverisjen e LDK-së.

Avni Fetahu nga Lëvizja Vetëvendosje tha se “Podujeva e ka blerë autoambulancën 60 mijë euro, derisa Mamusha një autoambulancë me performancë krejt të njëjtë e ka blere 38 mijë euro”.

Duke analizuar raportin financiar, Lëvizja Vetëvendosje tha që është rritur industria e korrupsionit.

Edhe nga PDK-ja pati kritika rreth financave. Rafet Llapashtica nga ky subjekt tha se “në kohë pandemie, komuna i ka paguar 14 euro një palë dorëza”.

Bile sipas analizës së PDK-së, makinat e komunës u prishën njëjtë, në të njëjtin vend, për dy vjet rradhazi, meqë çmimi për mirëmbajtje dhe riparim të automjeteve më 2019 ka qenë 17.122 euro, derisa këtë vit 17.467 euro.

Por, për krejt këto akuza kanë përgjigje nga LDK-ja. Adnan Zymeri tha se nëse opozita ka argumente të bazuara, atëherë duhet t’i drejtohet organeve të drejtësisë.

Ushtruesi i detyrës së Kryetarit të Podujevës, Nexhmi Rudari, i mori me qetësi këto kritika.

“E kuptoj se jemi në kohë fushate dhe priten deklarime të tilla”, tha ai.

Ky u lavdëruar se së shpejti do të bëjnë binjakëzim me një qytet të Iowas së SHBA-së, porse edhe këtu u kritikua për mëditje të panevojshme jashtë vendit.

Për të parin e Podujevës do të garojë Nexhmi Rudari nga LDK-ja, Shpejtim Bulliqi nga Lëvizja Vetëvendosje dhe Naim Fetahu nga PDK-ja.