Në PDK e LDK të bindur se demarkacioni nuk e përcakton të ardhmen e koalicionit

Zyrtarë të PDK-së dhe LDK-së  shprehen të bindur se çështja e demarkacionit nuk do të përcaktojë të ardhmen e koalicionit qeverisës.

Sipas Xhavit Halitit nënkryetar i Kuvendit dhe PDK-së, demarkacioni është çështja më e pa rëndësishmja në këtë legjislaturë që ta rrezikojë koalicionin.

Ai ka thënë se nuk sheh arsye që koalicioni të prishet për shkak të votimit ose mos votimit të demarkacionit, pasi siç është shprehur ai të dy partitë kanë qëndrim që kjo marrëveshje të miratohet.

“Është çështja më e pa rëndësishme në këtë legjislaturë që mund ta rrezikojë koalicionin votimi ose mos votimi i demarkacionit. Nivelet qendrore të dy partive janë për me votuar, sikur të ishte LDK-ja apo PDK-ja në tërësi kundër atëherë do të ishte interes i madh i njërës apo tjetrës parti”, ka thënë Haliti për lajmi.net

Ai ka thënë se votimi i kësaj marrëveshje është në interes të Kosovës dhe qytetarëve të saj.

I pyetur nëse koalicioni ka numrat për të kaluar kjo marrëveshje, pas paralajmërimit të Qeverisë se demarkacioni do të riprocedohet në Kuvend, Haliti ka thënë se nuk ka informacione për një gjë të tillë.

Edhe nënkryetari i Lidhjes Demokratike të Kosovës (LDK), Agim Veliu, ka hedhur poshtë mundësinë që të ketë zgjedhje të reja edhe nëse Kuvendi i Kosovës nuk e ratifikon marrëveshjen e demarkacionit me Malin e Zi.

Ai ka thënë se funksionimi apo prishja e koalicionit qeverisës si dhe mbajtja e zgjedhjeve nuk janë të lidhura me çështjen e demarkacionit.

“Koalicioni është lidhur mbi bazën e një marrëveshje për një qeverisje të përbashkët dhe nuk është i lidhur me një problematikë. Pra, funksionimi apo prishja e koalicionit qeverisës dhe mbajtja e zgjedhjeve nuk janë të lidhura me çështjen e demarkacionit”, ka deklaruar Veliu për gazetën “Epoka e Re”.

Riprocedimi i marrëveshjes së Demarkacionit me  Malin e Zi në Kuvend, pritet  të ndodhë gjatë javës së ardhshme. Kjo marrëveshje po kundërshtohet nga deputetët e opozitës dhe disa deputet të partive në pushtet./ Lajmi.net/