Agim Veliu: Demarkacioni të procedohet përkundër mungesës se Haradinajt

0

Nënkryetari i Lidhjes Demokratike të Kosovës, Agim Veliu thotë se Projektligji për Demarkacion me Malin e Zi, duhet të procedohet sa me shpejt në Kuvendin e Kosovës, dhe deputetët t’i japin epilog këtij procesi.

I pyetur, nëse ndalimi i Haradinajt në Francë, duhet ta prolongoj këtë proces, zyrtari i lartë i LDK-së, thotë se vendi patjetër duhet të ecë përpara me program dhe agjenda zhvillimore.

“Demarkacioni është diskutuar gjatë. Ne kemi pritë qe Haradinaj të lirohet dhe nuk është mirë ato me u ndërlidh. Por, prapë se prapë janë institucionet qe e vlerësojnë. Është Qeveria e Kuvendi ato qe vendosin. Por, unë jam i pajtimit qe të ecim tutje, të punojmë, sepse porosia e të gjithëve është të ecim përpara. Nuk do të duhej me pa pengesa rrugës shumë”, ka thënë Veliu për ‘Indeksonline’.

Kryetari i komunës se Podujevës, ka hedhur poshtë zërat se ndalimi i ish kryeministrit të Kosovës, Ramush Haradinajt është i ndërlidhur me çështjen e demarkacionit.

“Unë nuk e di kam dëgjuar zëra qe e implikojnë rastin Haradinaj me këto punë tona të përditshme, unë nuk kisha dashtë më i ndërlidhe. Ndalimi i tij nuk ka kurrfarë lidhje, bile me demarkacionin më se paku. Unë nuk dua të besoj në aso teori konspirative, çfarë i bëjnë njerëzit dhe çfarë i bën Pal Lekaj me vetëdije apo pa vetëdije”, ka shtuar ai.

Vet kreu i Kuvendit, Kadri Veseli ka paralajmëruar dy ditë më parë se demarkacioni me Malin e Zi do të diskutohet javën e ardhshme në Kuvend. Ndërsa, në mbledhjen e sotme të Qeverisë, pritet të diskutohet për raportin e Komisionit Qeveritar i cili ka bërë matjen e territorit të vendit./Indeksonline/L.B