Milaim Zeka e Bekim Haxhiu i reagojnë komandant Remit pse tha që Albinin e kishte bashkëluftëtar

Bekim Haxhiu dhe Milaim Zeka i kanë reaguar Rrustem Mustafës i cili tha se Albin Kurtin e kishte bashkëluftëtar, transmeton PodujevaPRESS.net

Bekim Haxhiu i reagon Remit: Kurti e ka refuzuar armën dhe uniformën e UÇK-së

Deputeti nga radhët e PDK’së, Bekim Haxhiu, i ka reaguar bashkëpartiakut të tij, Rrustem Mustafës, lidhur me deklaratën e tij se kreun e Vetëvendosjes, Albin Kurtin, e ka pasur bashkëluftëtar.

Ai e ka pyetur Mustafën se ku ka luftuar me Kurtin, meqenëse, siç ka thënë, askush nuk i ka parë bashkë.

Tutje, Haxhiu ka thënë se Kurti ka refuzuar armën dhe uniformën e UÇK’së.

“Rem, për luftën tënde nuk ka dilema, por të gjithë e dimë që Albini ka refuzuar armën dhe uniformën e UÇK-së , ai është përcaktuar për zyre politike.

Të thoje se Albini ka qenë pjesë e zyres politike të UÇK-së në Prishtinë të udhëhqur nga Adem Demaqi është OK dhe është e vërtetë.

Por te thuash e kam bashkëluftëtar, ia ke humbur kuptimin fjalës BASHKËLUFTOJ…”, ka shkruar Haxhiu.

Zeka: Nëse Remi e ka pasur Albinin bashkëluftëtar, unë e kam pasur Remin bashkëlojtar të guxhave

Gazetari Milaim Zeka ka komentuar deklaratën e Rrustem Mustafës-Remit i cili deklaroi mbrëmë se kryeministrin Albin Kurti e ka pasur bashkëluftëtar në UÇK.

Zeka duke ironizuar me këtë deklaratë ka thënë se Remin e ka pasur bashkëlojtar të lojës së guxhave.

“Remi dhe loja e guxhave me luftën. Rrustem Mustafa – Remi, tha në një deklaratë se ”Albin Kurtin e ka pas bashkëluftëtar” ktynehere. Thash me tregu edhe unë që Remin e kam pasv bashkëlojtar të guxhave, në oborrin e shkollës fillore në Abri. Nëse e para është e vërtetë, pse mos me kanë edhe kjo e dyta” , ka shkruar ai.

Ish-komandanti i UÇK’së për Zonën Operative të Llapit, Rrustem Mustafa – Remi, në emisionin Pressing të T7, ka thënë se kryeministrin e Kosovës, Albin Kurtin, e ka pasur bashkëluftëtar në UÇK.

Këtë deklaratë Remi e tha pasi u pyet për deklaratën e tij në Bruksel ku tha se Ballkani Perëndimor duhet pastruar skena politike nga kriminelët e luftës dhe të paqës.

“Po flet ashtu sikur ai e njeh problemin, në vendin tonë nuk ka pasur krime lufte nga çlirimtaret. Unë Albin Kurtin e kam pasur bashkëluftëtar. Me Albin Kurtin jam takuar edhe në shtabin e Ushtrisë Çlirimtare të Kosovës. Jemi takuar për qëllime të çlirimit të vendit. Ai ka qenë me detyra të veçanta në Drejtorinë Politike. Por, kemi pasur kontakte gjithëpërfshirëse. Gjatë kohës sa ishte pjesë e zyrës së Adem Demaci”, tha Remi.