Llapjani e sulmon fizikisht të dashurën me të cilën bashkëjeton, Policia në ndjekje të tij

Vajzat dhe gratë po vazhdojnë të jenë viktimat më të shpeshta të dhunës që përjetojnë kryesisht nga partnerët e tyre. Kjo dukuri shqetësuese ka marrë përmasa të mëdha kohëve të fundit dhe kjo dëshmohet çdo ditë me numrin e rasteve të tilla që denoncohen në Polici, raporton Gazeta Sinjali.

Një rast i tillë ka ndodhur dje në Podujevë, ku një 30-vjeçar po dyshohet se ka ushtruar dhunë fizike dhe psikike ndaj të dashurës së tij.

Burimet e Gazetës Sinjali kanë bërë me dije se viktima e ka raportuar rastin në Polici, ku ka rrëfyer për atë që ndodhi dhe sulmin e të dashurit, me të cilin bashkëjetojnë qe një kohë.

Si rezultat i denoncimit, Policia është aktivizuar por akoma nuk ka arritur ta arrestojë personin e dyshuar.

Pas përfundimit të procedurave policore, Prokurori i Shtetit ka urdhëruar inicimin e rastit dhe ndërmarrjen e veprimeve të nevojshme për të siguruar prezencën e të dyshuarit.