LDK-ja në Podujevë akuzon zyrtarët komunalë se kanë bërë pagesa duke shpërfillur ligjet në fuqi

Kuvendarët e LDK-së në Podujevë i kanë akuzuar zyrtarët komunalë se kanë bërë pagesa duke shpërfillur ligjet në fuqi. Këshilltari komunal nga kjo parti, Qëndrim Softolli, ka thënë se gjatë vitit 2022 janë realizuar projekte pa planifikim paraprak. Duke folur për raportin financiar vjetor të kësaj Komune, ai ka folur për secilin drejtori, që sipas tij, ka pasur pagesa të tilla.

“Drejtoria e Shëndetësisë ka paguar për shpenzime të varrimit në shumën prej 11.700 euro, aktivitet i shërbimeve publike, shërbime këshilluese dhe intelektuale 813 euro (pagesë për punëtorët e komunës tek Drejtoria e Urbanizmit), furnizimi me kifle për nxënës me përshkrimin ushqim dhe pije shumë prej 26.488 euro (aktivitet i Drejtorisë së Arsimit), ngrijta e produktivitetit të turizmit pagesa 648 euro (aktivitet i Drejtorisë së Planifikimit dhe Zhvillimit Ekonomik)”, ka thënë Qëndrim Softolli.

Sipas tij, kjo Drejtori ka bërë pagesa edhe për furnizime me kabinete në vlerë 22.994 euro. “Pastaj bartja e nxënësve pagesë 3.750 euro (aktivitet i Drejtorisë së Arsimit), mirëmbajtja shkollore shuma 727euro (aktivitet i Drejtorisë së Arsimit), kemi 53.783 euro shpenzime të pa planifikuara një shumë kaq e madhe për dezinfektim, dezinsektim e derratizim. Vlen të ceken shpenzimet telefonike 3000 euro dhe shpenzime për dreka e darka 1575 euro”, ka thënë Softolli.

Duke folur për Drejtorinë për Pronë, Gjeodozisë dhe Kadastër, kuvendari i LDK-së ka thënë se kishte planifikuar buxhet prej 10.000 euro kurse ka shpenzuar 9.600 euro për trajtimin e qenve endacakë.

“Ne e dimë që ky është aktivitet është i Drejtorisë së Shërbimeve Publike dhe asaj të Bujqësisë. Drejtoria e Planifikimit dhe Zhvillimit Ekonomik ka planifikuar dy aktivitete dhe ka shpenzuar në gjashtë aktivitete. Drejtoria e Shërbimeve Publike ka planifikuar 10 aktivitete e ka shpenzuar në 23 aktivitete paramendo 13 aktivitete të pa planifikuara. Drejtoria e Administratës ka planifikuar buxhetin në 16 kode dhe ka shpenzuar në 32 aktivitete”, ka theksuar Softolli.

“Drejtoria e Inspeksionit planifikon buxhet vetëm me dy kode, gjegjësisht aktivitete një shërbime kontraktuese tjera dhe pajisje, kurse ka shpenzuar pa planifikim në furnizim për zyrë, shërbime të përfaqësimit, e ka është interesant kjo Drejtori merret edhe me zgjerimin dhe rregullimin e lumit Llap ku shpenzon nga buxheti i saj hiç më pak se 4.874 euro”.

Sipas tij, Drejtoria e Kulturës ka planifikuar buxhet në dy kode ose aktivitete në shumën 45.000 euro blerje mallrash.

“Në planin kontabël nuk e gjen si kod dhe shërbime kontraktuese. Kurse shpenzon në 13 aktivitete të ndryshme, pra 11 aktivitete të pa planifikuara. Drejtoria e Bujqësisë ka një shpenzim interesant ku rreth 4.000 euro shpenzohen për mbajtëse të flamujve, kur e dimë që është aktivitet i Drejtorisë së Shërbimeve Publike”, është shprehur Softolli.

“Drejtoria e Urbanizmit planifikon buxhetin për mallra dhe shërbime vetëm me një kod të vetëm: shërbime kontraktuese (hartim i projekteve) dhe buxhetin e harxhon në pesë kode të pa planifikuara. Vlen të ceket se nga 70.000 euro të planifikuara për hartim projektesh harxhon vetëm 7.003 euro për këtë aktivitet. Edhe kjo Drejtori shpenzon në shërbime intelekuale 3.600euro, për ushqim dhe pije dhe dreka, darka 405 euro dhe shërbime të DDD 1.100euro”, ka shtuar ai.

Këshilltari komunal nga radhët e LDK-së ka pasur akuza edhe për mostransparencë nga zyrtarët komunalë. “Kjo mostransparencë në Drejtorinë për Arsim paraqitet si te mallrat dhe shërbimet e po ashtu edhe te kapitalet, po shumë më keq qëndron te pagat. Punësimet pa kontrata, ndarja e normave sipas preferencave politike, plotësim i normave për aktivistë të Lëvizjes në emër të bibliotekistëve edhe në ato shkolla që nuk kanë fare biblioteka. Drejtori planifikon buxhetin te mallrat dhe shërbimet në 11 kode e shpenzon në 23 sosh, që do të thotë mbi 100% e shpenzimeve janë të pa planifikuara”.

Në anën tjetër, drejtori për Buxhet dhe Financa, Fatlum Osmani, ka thënë se në çdo organizatë buxhetore është e pamundur të mos evidentohet ndonjë e gjetur nga Auditori.

“A ka ndonjë e gjetur ku Komunës së Podujevës i është shkaktuar dëm financiar, kjo është çështja kryesore. Në bazë të të gjeturave të Auditorit, edhe këtë vit fatmirësisht nuk është asnjë e gjetur që Komunës i është shkaktuar dëm financiar. Te çështja e keqklasifikimeve që u diskutua në çështjen e përgjithshme, prap po them se Komuna e Podujevës është prej komunave që më së paku ka keqklasifikime buxhetore”, ka deklaruar Fatlum Osmani.

“Keqklasifikimi është kur ndërrohet kategoria buxhetore, ta zëmë nga kategoria e kapitaleve paguhet mall, ose nga kategoria e mallrave paguhet subvencion e që e vërteta është se edhe në Komunën e Podujevës janë disa keqklasifikime, ku në mungesë të mjeteve financiare për ndonjë pagesë, normalisht që bëhet keqklasifikimi, por që është një domosdoshmëri”, ka shtuar ai.

Këshilltarët opozitarë kanë pyetur edhe për kontratat mbi vepër, por që drejtori Osmani ka thënë se Komuna e Podujevës nuk ka punësuar asnjë punëtor me kontratë mbi vepër. Sipas tij, bëhet fjalë vetëm për disa punëtorë që janë të punësuar përmes praktikës në institucione e që kjo është bërë nga Ministria e Financave dhe Punës dhe Agjencisë së Punësimit.

“Sa i përket planifikimit, p.sh. në 4 kode ndërsa pagesa për 10 aktivitete kjo është për shërbime kontraktuese, por me planin kontabël, ky nuk është keqklasifikim për arsye se janë paguar mallra për këto aktivitete. Me ato mjete që janë planifikuar mallra, janë paguar mallra”, ka thënë ai./KOHA net/Nexhat Toverlani/