Kurti me mesazh për diasporën, flet për Podujevën

Duke u uruar mirëseardhje në Kosovë, kryeministri Albin Kurti i ka thënë diasporës se kur të vijë në Kosovë nëpërmjet rrugës Prishtinë-Podujevë “do të shohë se si edhe këtu mund të bëhet mirë e drejt, sikur në vendet ku jetojnë e veprojnë”.

Në mbledhjen e Qeverisë të mërkurën, Kurti ka thënë se ardhja e diasporës në Kosovë është moment i veçantë për të gjithë dhe është shprehje e lidhjes së përjetshme që tejkalon kufijtë dhe kohën.

“Edhe këtë vit le të përjetojmë së bashku bukuritë e natyrës dhe trashëgimisë sonë kulturore, t’i lidhim gjeneratat e reja me tokën e tyre e le të mësojmë prej më të moshuarve. Në gjuhën tonë qëndrojnë mrekullisht dy fjalë për vendlindjen: Mëmëdheu e atdheu, toka e nënës dhe e babait. Prandaj edhe lidhja juaj me Kosovën është më e thellë. Në këtë drejtim më lejoni t’ju falënderoj për përkushtimin tuaj për t’i ruajtur traditat tona për rolin tuaj të rëndësishëm në zhvillimin ekonomik social e politik. Ecja jonë e shpejtë drejt forcimit të vendit është më e lehtë kur në mendjen tonë e dimë se kemi mbështetjen tuaj. Prandaj kontributi juaj ndihet në të gjithë sektorët e vendit dhe jemi pafundësisht falënderues për angazhimin dhe rolin tuaj të vazhdueshëm për zhvillimin e vendit”, ka thënë Kurti në hyrje të mbledhjes.

“Siç mund ta dini kemi filluar rregullimin, zgjerimin dhe shtrimin e rrugës Prishtinë – Podujevë. S’është rrugë vetëm për qytetarët e Llapit, por në të vërtetë është rruga e mërgatës. Shumë shpejt kur të kaloni nga Merdarja në Prishtinë e nëpër shtëpitë tuaja, rruga do të jetë vetëm një prej gjërave që do e shihni se si edhe këtu mund të bëhet mirë e drejt njësoj sikur edhe në vendet ku jetoni e veproni”, ka vazhduar Kurti duke thënë se Qeveria ka përpiluar “listë të gjatë të aktiviteteve të dedikuara për mërgatën”.