Komuna e Podujevës premton zgjidhje të shpejt për Tregun e Gjelbërt

Me iniciativë të drejtorëve, Pajtim Balaj, drejtor i Planifikimit dhe Zhvillimit Ekonomik, Fevzi Jetullahu, drejtor i Shërbimeve Publike dhe Bedri Maçastena, drejtor i Inspeksionit, sot u mbajt takim i përbashkët më përfaqësues te shitësve ambulantë të cilët veprojnë afër Tregut të Gjelbër, thuhet në njoftimin e zyrës për informim të kësaj komune, transmeton PodujevaPRESS.net

Drejtori i Planifikimit dhe Zhvillimit Ekonomik, Pajtim Balaj tha se qëllimi i këtij takimi është të diskutojmë dhe të nxjerrim idetë më të mira për funksionalizimin e Tregut të Gjelbër dhe përmes kësaj t’i japim fund shitjes në skajet e rrugëve, të cilat paraqesin rrezik dhe shumë herë edhe pengojnë komunikacionin dhe veprimtaritë tjera.

Tregtarët pjesëmarrës në takim, qoftë nga sektori i pemëve dhe perimeve, por edhe të veprimtarive tjera kërkuan nga përfaqësuesit e ekzekutivit të ndërmirren hapat e nevojshëm për mbulimin e çirave, për lokalet e ndara për ta vite më parë, e që nuk janë funksionalizuar asnjëherë.

Në takim, po ashtu u kërkua nga komuna që të krijohet mundësi e barabartë për të gjithë shitësit, si dhe të sigurohet një lokacion i përshtatshëm ku do të mund ta zhvillonin veprimtarinë e tyre edhe shitësit të cilët në treg dalin vetëm ditën e shtunë, në mënyrë që mos të paraqesin pengesë gjatë ushtrimit të veprimtarisë së tyre.

Përfaqësuesit e ekzekutivit u zotuan se bazuar në idetë që dolën nga takimi dhe në kompetencat e komunës në ditët në vijim do të ndërmerren veprimet e nevojshme për të cilat do të njoftohen edhe përfaqësuesit e bizneseve në fjalë.

Kështu duket Tregu i Gjelbërt në Podujevë