Komuna e Podujevës arsyeton kthimin në punë të zyrtarit që VV-ja e akuzonte për kurdisje tenderësh

Dy vendime të kundërta brenda pak muajve i ka marrë drejtori i Administratës komunale, Bahri Selimi, ndaj menaxherit të Zyrës së prokurimit publik në Podujevë, Rasim Fejza. I pari vendim e transferonte përkohshëm Fejzën në Drejtorinë për Shërbime Publike, e tjetri e ka kthyer atë në pozitën e mëparshme. Selimi thotë se është detyruar ta kthejë Fejzën në këtë pozitë, pasi, sipas tij, ushtruesja e detyrës së menaxherit të Zyrës së prokurimit ka dhënë dorëheqje.

Kthimi i Rasim Fejzës në pozitën e shefit të prokurimit në Komunën e Podujevës është arsyetuar nga Drejtoria komunale e Administratës.

Bahri Selimi, në cilësinë e sekretarit organizativ të LVV-së në Podujevë, tetorin e vitit të shkuar kishte ushtruar kallëzim penal ndaj Fejzës, me pretendimin për kurdisje tenderësh gjatë qeverisjes së LDK-së.

Por tani Selimi thotë se është detyruar ta kthejë Fejzën në këtë pozitë, pasi, sipas tij, ushtruesja e detyrës së menaxherit të Zyrës së prokurimit ka dhënë dorëheqje dhe nuk kanë pasur me kë ta zëvendësojnë.

“Dhe kur ajo ka dhënë dorëheqje ne nuk kemi pasur mundësi që ta caktojmë dikë tjetër, sepse menaxheri duhet ta ketë licencën e vetë që mund të jetë menaxher i prokurimit dhe tash projektet apo procedurat nuk zhvillohen pa pasur menaxher të prokurimit. Sepse të gjitha procedurat apo zhvillimi i procedurave të prokurimit bëhet përmes menaxherit të prokurimit dhe nënshkruhet nga menaxheri. Dhe ne kemi qenë të detyruar që ta rikthejmë Rasim Fejzën në pozitën paraprake”, ka thënë Selimi.

Kur është pyetur nëse i besojnë të njëjtit edhe pas videos ku Fejza shihet duke negociuar me një operator ekonomik, drejtori Bahri Selimi ka thënë se dallaveret nuk mund të bëhen nga një person i vetëm.

Kallëzimi penal ndaj Fejzës është dorëzuar para pesë muajsh. KOHA ka pyetur Prokurorinë Themelore të Prishtinës se në cilën fazë gjendet ky rast, por nuk ka marrë përgjigje as pas tri ditësh.

Mirëpo Bahri Selimi thotë se si dorëzues i kallëzimit penal akoma nuk janë ftuar nga prokuroria.

“Ajo vendos në bazë të argumenteve do ta dërgojë në Gjykatë apo nuk do ta dërgojë. Sigurisht se ne do të ftohemi aty. Lënda është në proces dhe ne nuk kemi hequr dorë nga kallëzimi penal dhe ne jemi aty. Kur të na ftojnë ata, ne do t’iu përgjigjemi edhe do të shkojmë aty ta japim mendimin tonë edhe në bazë të asaj që ne e kemi dorëzuar në muajin tetor”, ka deklaruar ai.

Lëvizja Vetëvendosje vazhdimisht ka bërë thirrje për mosangazhim të zyrtarëve në institucione publike, të cilët dyshohet se kanë probleme me ligjin.

KOHA ka tri ditë që ka pyetur LVV-në nëse rasti i Fejzës është në kundërshtim me thirrjet e tyre, por zyrtarë të kësaj partie nuk janë deklaruar.

Me të ardhur në pushtet, zyrtarët e LVV-së në Podujevë kanë marrë dy vendime të ndryshme ndaj Fejzës.

Fillimisht atë e kishin transferuar si zyrtar për efiçiencë në Drejtorinë për Shërbime Publike.

Por, në fundjavën e shkuar, ky vendim është shfuqizuar dhe Fejza është kthyer në pozitën e menaxherit të Zyrës së prokurimit.

Të dy këto vendime janë marrë nga drejtori i Administratës komunale, Bahri Selimi.

 

© KOHA.