Kjo është jeta dhe vepra e patriotit të madh llapjan Hasan Ramadani

Hasan Ramadani rrjedh nga një familje me tradita patriotike, e cila ishte me origjinë nga Toplica, njofton PodujevaPRESS.

U lind më 1 tetor 1948 në fshatin Shajkofc në një familje të varfur po bujare. Hasani ende pa i mbushur 1 vit i vdes babai dhe mbeti jetim shumë heret, edhe pse nëna e Hasanit, Zaha, mbeti shume e re. Pas shumë vuajtjeve dhe sakrificash Hasani në moshën 8 vjeçare mbeti edhe pa nënë.  Për Hasanin u kujdesen axha i vet Hamiti dhe gruaja e tij Raza.

Hasan Ramadani në moshën shtatë vjeçare ishte regjistruar në shkollën fillore në fshat dhe pasi kreu 4 klasët e para ai e ndërpreu mësimin për shkak të kushteve të rënda.

Në moshën 18 vjeçare  i erdhi ftesa për ta kryer shërbimin ushtarak, të cilin e përfundoi për 18 muaj në Boegrad. Sapo u kthye në shtëpi Hasani kërkoi punë në Podujevë e Prishtinë, por nuk gjeti askund. Hasani u detyrua nga skamja të kërkoi punë edhe në Beograd, ku përmes një sipërmarrje ai u dergu përkohësisht të punoi në Çekosllovaki. Pas një kohe të gjatë, i lodhur kthehet nga gurbeti në vendlindje dhe gjen punë në tjegulloren e Podujevës në vitin 1978. Mirëpo, këtu nuk punoi shumë  kohë. Në tjegullore filluan të shpërndahen afishe dhe në muret e fabrikës u shkruan shumë parulla, si: Kosova Republikë, Liri e Pavarësi, Demokraci.

Hasani pasi u burrërua, axha i tij e martoi me Emine Poterën të bijën e Halil Poterës nga Llapashtica e Poshtme, me të cilën krijoi familje.

Veprimtaria politike

Hasanin e ushqenin shpirtërisht veprat atdhetare të Bec Sinanit, Azem Bejtës, Hasan Prishtinës, ndërsa personaliteti më i adhuruar nga ai ishte Adem Demaçi. Ka bashkëpunuar me Afrim Zhitinë, të cilin e çmonte si atdhetar të madh dhe njeri të pendës

Pas shpërthimit të demonstratave të fuqishme të vitit 1981  me kërkesat e shqiptarëve shtet, filluan të veprojnë shumë organizata politike në radhët e të cilave u bashkëngjit edhe Hasan Ramadani. Ai u bashkua me Çetën e Llapit- Grupi i Llapit,e cila u themelua në vitin 1978 e cila luftoi me pushkë në dorë për çlirimin e Kosovës. Grupi i Llapit veproi me Avdi Gjatën, Hamit Hamitin, Shaban Mulollin, Sabri Hamitin, Ali Ajetin, Hetem Ajetin, Kadri Maçastenën, Qazim Asllanin, e shumë të tjerë. Grupi ra në kontakt me Bajram Ajetin, Bajrush Behramin dhe Ismet Begollin.

Hasan Ramadani u bë anëtar i Lëvizjes Popullore për Republikën e Kosovës, e cila kishte që vepronin, njëra në Kosovë e tjetra në perëndim.

Hasan Ramadani pas shumë aktiviteteve ishte arrestuar dhe burgosur nga policia serbe në vitin 1984 së bashku me shumë veprimtarë të tjerë, ku u torturuan në mënyrë çnjerëzore. Hasani u lirua nga burgu pas disa muaj, ishte i dërmuar fizikisht por me moral të lartë.

Pas viteve të 90-ta në Kosovë dhe në Llap u burgosën shumë aktivistë politik. Një pjesë jetonin në ilegalitet të thellë, e në mesin e tyre ishte edhe Hasan Ramadani.

Në gushtë të vitit 1994 spiunët e kishin vërejtur se Hasani ishte kthyer në shtëpi, ndërsa me 6 gusht rrethohet shtëpia nga forcat e mëdha të policisë të përcjella me tanke dhe blinda ushtarake. Hasani ishte nën rrethim të plotë, ndërsa vetë nuk u dorëzua për së gjalli e fëmijëve u kërkoi të dalin të gjallë. Vajza e Hasanit Fidajetja nuk doli dhe ishte këmbëngulëse, ajo i ndihmoi babait të mbush armët me municion dhe largonte lotsjellësit që hidhnin policia.

Gjatë gjithë kohës ajo ishte me babanë, derisa Hasan Ramadani u vra ditën e errët të 7 gushtit të vitit 1994 në fshatin Shajkofc të Podujevës.

Bëje LIKE faqen PodujevaPRESS për tu njohur me lajmet e fundit nga Podujeva: KLIKO KËTU

(Redaksia e portalit informativ PodujevaPRESS ka përmbledhur pjesë të shkrimeve për jetën dhe të kaluarën e banorëve të Podujevës nga punime të ndryshme shkencore. Qëllimi i këtij shkrimi ishte të dalin në dritë informata dhe brezat e rinj llapjanë të din më shumë për banorët e kësaj treve, dhe të parët e tyre).