FSK me kompetenca te zgjeruara apo Ushtri e Kosovës

Nesër në seancën parlamentare të Kuvendit të Kosovës, do të debatohet për transformimin e Forcës së Sigurisë së Kosovës në Ushtri të Kosovës.

Sfida kryesore vazhdon të jetë kundërshtimi i listës serbe, për transformimin e FSK-së, por sipas deputetëve për të shmangur votën e serbëve në Kuvend, do të provohet që me shumicën e thjesht të votave të ndryshohet ligjin për FSK-në dhe ti jepet një zgjerim i kompetencave asaj.

Shefi i grupit parlamentar të PDK-së, Zenun Pajaziti, në një prononcim për Indeksonline ka thënë se debati i nesërm në Kuvend do të shfaqë gatishmërinë dhe interesimin e deputetëve dhe forcave politike për transformimin FSK-së në ushti.

“Unë pres që nesër debati të jetë i pjekur dhe që kjo temë të mos trajtohet në frymën e ngjarjeve të ditës. Ky është një proces ku ne si Parti Demokratike kemi bërë përpjekje edhe më herët ku kemi krijuar edhe në mandatin e kaluar një shanse për të cilën nuk kanë qenë në gatishmëri të gjitha forcat politike për ta bërë. Pavarësisht nga kjo ne duhet të gjejmë një frymë të komunikimit normal mes nesh sepse kjo nuk është një punë që varet vetëm nga dëshira dhe vullneti ynë”, ka thënë ai.

Ndërkaq shefi i grupit parlamentar të AAK-së, Pal Lekaj ka thënë se e pa pritshme që lista serbe të kthej qëndrimin e saj pro transformimit të FSK-së.

Sipas tij opsioni që me shumicën e thjesht të votave për të ndryshuar ligjin për FSK-në dhe për ti dhënë zgjerim të kompetencave asaj, është zgjidhja momentale e duhur.

“Sa i përket iniciativës së zotit Haradinaj, mënoj që nesër do të diskutohet për të ardhmen e FSK-së, për të shndërruar në forca të Armatosura të Kosovës apo për të miratuar një ligj që e zgjeron fushveprimtarinë e FSK-së pa e ndryshuar kushtetutën sepse ne mendojmë që nuk mund të presim pa kufi  vendimin e listës serbe sepse duhet qëndrimi i tyre për Ushtrinë e Kosovës dhe është e pa mundur të kemi përkrahje dhe votim nga ana e tyre sepse duhen ndryshime kushtetuese, 2 të tretat e listët serbe dhe 2 të tretat e kuvendit që ne mendojmë se e pa mundur”, ka thënë Lekaj. /Indeksonline/