Çudit Komuna e Podujevës: Tenderin e furnizimit me pemë e fiton kompania e specializuar në ndërtimin e rrugëve

Kohë më parë, Komuna e Podujevës e kishte hapur një tender për furnizimin me pemë dhe perime, në të cilin kishte aplikuar vetëm një kompani. Mirëpo, fituesi i tenderit, që është kompania GeoGroup ING SH.P.K., del të mos jetë e specializuar në punët për të cilën e fitoi tenderin, vlera e të cilës është tejkaluar pa ndonjë shpejgim. Sipas komunës, gjithçka ka shkuar sipas ligjit. Por çfarë ndodhi?

Duke u bazuar në Agjencinë e Regjistrimit të Bizneseve të Kosovës, kompania fatlume që fitoi tenderin nga Shpejtim Bulliqi i Podujevës, furnizimin me pemë dhe perime nuk e ka as punë primare e as sekondare.

Sipas ARBK-së, Kompania GeoGroup ING SH.P.K. me seli në Sebrenicë të poshtëm të Prizrenit punë primare e ka ndërtimin e rrugëve dhe autostradave, ndërsa puna e saj sekondare është ndërtimi i projekteve të tubacioneve dhe kanalizimeve, ndërsa ndër punët e tjera të kësaj kompanie është edhe tregtia.

Më të hapur ky tender, komuna kishte parashikuar çmimin 2 mijë e 200 euro, ndërsa kompania në fjalë ka rrëmbyer nga buxheti i komunës së Bulliqit 1 mijë e 748 euro më shumë, pasi që çmimi fitues është 3 mijë e 948 euro.

Në dosjen e tenderit nuk është bërë e ditur pse është tejkaluar vlera e parashikuar, ndër të tjera në kontratën e publikuar në KRPP ka aplikuar vetëm një kompani.

Gazeta Nacionale i është drejtuar kompanisë për të pyetur se a do të ia dalë për të kryer furnizimin e kërkuar nga komuna e Podujevës.

Gazmend Hoti, menaxher i kësaj kompanie në një prononcim për Nacionalen ka thënë se të dhënat në ARBK janë nga e kaluara.

“Ato aktivitet na kanë mbetur nga e kaluara, se ne realisht mëremi me tregti. Kemi mbetur ende pa i ndryshuar dhe jemi në proces në ndryshimin e tyre ne ARBK. Ne i kemi edhe të tjerat aty të paraqitura.” – ka thënë Hoti.

Ndërsa për çmimin e tenderit, pasi që kompania e fitoi dyfish më shtrenjtë nga ajo që ishte parashikuar, Hoti ka thënë se krejt kjo ka ndodhur për shkak të inflacionit.

“Inflacioni ka ndiku me qenë çmimi kaq i lartë.” – ka përfunduar ai.

Nacionale i është drejtuar edhe komunës së Bulliqit për të pyetur rreth këtij tenderit.

Në një prononcim kanë bërë të ditur se tenderit për furnizimin e pemëve dhe perimeve është hapur për furnizimin e dy çerdheve publike që gjenden në komunën e Podujevës.

Nga komuna kanë thënë për Nacionalen se kompania në fjalë i ka përmbushur kriteret e kërkuara.

“Në tenderin për furnizimin me pemë dhe perime për dy çerdhet publike ka aplikuar vetëm kompania në fjalë, por siç mund të shihni edhe në ARBK kjo kompani merret me shumë veprimtari e njëra ndër to është edhe tregtia me shumicë e frutave dhe perimeve. Përderisa kjo kompani i ka plotësuar kriteret e kërkuara dhe siç shihet edhe në certifikatën e biznesit merret edhe me këtë veprimtari, si dhe është kompania e vetme që ka aplikuar për këtë tender.” – thuhet në përgjigjen e komunës.

Ndërsa sa i përket çmimit të planifikuar dhe atij fitues, nga Komuna e Podujevës kanë thënë se arsyeje është rritja e çmimeve në treg, dhe sipas tyre janë detyruar për shkak të dështimit të disa hershëm të këtij projekti.

“Kur është bërë planifikimi i mjeteve kanë qenë të tjera çmime, andaj janë planifikuar 2 mijë euro, por ngritja e çmimeve në treg ka ndikuar të rritet edhe çmimi i ofertuesit. Një arsye shtesë që ka ndikuar për lidhjen e kësaj kontratës me këtë ofertë ka qenë edhe dështimi i disa hershëm i këtij projekti dhe kanë mbetur çerdhet pa u furnizuar me këto produkte.” – thuhet ndër të tjera në përgjigjet e Komunës së Podujevës.