Peci dorëzohet para presionit publik: Anulon grantet për këshilltarin e tij dhe
CorrWatch: MMPHI me shkelje të njëpasnjëshme në tenderin për rrugën Prishtinë-Podujevë
Një varg shkeljesh janë evidentuar nga konsorciumi i organizatave të shoqërisë civile “CorrWatch” në tenderin për rrugën Prishtinë-Podujevë. Sipas raportit, Ministria e Infrastrukturës në mënyrë të kundërligjshme ka nënshkruar kontratë ani se për këtë procedurë tenderuese pati ankesë të pashqyrtuar në Organin Shqyrtues të Prokurimit. “CorrWatch” ka kërkuar hetim të këtyre kontratave, si dhe anulim të vendimeve
Ministria e Infrastrukturës ka nënshkruar kontrata me kompani për ndërtimin e rrugës Prishtinë-Podujevë, ani se për fituesin e njërit prej loteve të tenderit pati ankesë të pashqyrtuar në Organin Shqyrtues të Prokurimit (OSHP).
Kjo është një nga shkeljet që ka evidentuar konsorciumi i shoqërisë civile “CorrWatch” gjatë monitorimit të këtij procesi. Sipas konsorciumit që e përbëjnë GLPS, Instituti GAP dhe Instituti INDEP, Ministria e Infrastrukturës ka qenë e obliguar që automatikisht ta pezullojë procedurën dhe të mos ndërmarrë asnjë veprim procedural derisa të trajtohet ankesa dhe të ketë vendim nga OSHP-ja.
Kundër këtij aktiviteti të prokurimit kompania “Sallahu” ka deponuar ankesë në OShP më 13 qershor, një ditë pas njoftimit për dhënie të kontratës. Në të njëjtën ditë kjo kompani ka bërë kërkesë për mosnënshkrim të kontratës.
E Durmishi, sipas “CorrWatch”, në mënyrë të kundërligjshme ka nënshkruar kontratat e këtij aktiviteti të prokurimit.
“Vendimi me të cilin është autorizuar zëvendësministri për nënshkrimin e kontratave në vitin 2021 ka qenë në kundërshtim me LPP (neni 26, paragrafi 2) dhe i njëjti nuk ka pasur bazë ligjore. Për më tepër, MMPHI ka vazhduar të përdorë të njëjtin vendim edhe pas hyrjes në fuqi të Ligjit për Qeverinë. Më konkretisht, neni 12 i Ligjit për Qeverinë saktëson delegimin e përgjegjësive të ministrit të caktuara me ligj, nga ky i fundit tek zëvendësministri”, ka vlerësuar “CorrWatch”.
Tenderi në vlerë 35 milionë eurosh është përcjellë me dyshime pasi njërin nga lotet e këtij tenderi, me vlerë 8 milionë euro, e ka fituar kompania “Bageri”, e afërt me zëvendësministrin Hysen Durmishi.
Deklarimet publike të zëvendësministrit për njohje personale me pronarin e njërës nga kompanitë fituese, sipas konsorciumit “CorrWatch”, paraqesin konflikt interesi.
Sipas “CorrWatch”, MMPHI-ja nuk ka marrë për bazë as rekomandimet e Komisionit Rregullativ të Prokurimit Publik (KRPP) që kërkoi përmirësim të vendosjes së “Kritereve kualifikuese, të cilat ishin në kundërshtim me Ligjin për Prokurimin Publik (LPP).
Këto organizata kanë bërë thirrje që të anulohen vendimet e marra, sipas tyre, në mënyrë të kundërligjshme, si dhe iu kanë bërë thirrje organeve të hetuesisë që ta hetojnë këtë aktivitet të prokurimit.
