Auditori kritika për Komunën e Podujevës: Ja çfarë shkruan lidhur me menaxherët e projekteve

Është publikuar raporti për pasqyrat financiare vjetore të Komunës së Podujevës për vitin 2022, njofton PodujevaPRESS.net

Sipas raportit këtë vit auditori ka bërë opinion të kualifikuar, që i bije se ka keq menaxhim të financave publike.

Kritika i janë dhënë edhe menaxherëve të projekteve duke i quajtur neglizhues.

Kritika ka edhe ndaj Kryetarit të Komunës: Kryetari i Komunës është përgjegjës për përgatitjen dhe prezantimin e drejtë të Pasqyrave Financiare sipas Standardeve Ndërkombëtare të Kontabilitetit në Sektorin Publik – Raportimi Financiar bazuar në Kontabilitetin e Parasë së Gatshme. Po ashtu, Kryetari i Komunës është përgjegjës edhe për vendosjen e kontrolleve të brendshme, të cilat i përcakton si të nevojshme për të mundësuar përgatitjen e Pasqyrave Financiare, pa keq deklarime materiale të shkaktuara, qoftë nga mashtrimi apo gabimi. Kjo përfshinë përmbushjen e kërkesave që burojnë nga Ligji nr. 03/L-048 për Menaxhimin e Financave Publike dhe Përgjegjësitë dhe Rregullorja nr. 01/2017 për Raportim Vjetor Financiar nga Organizata Buxhetore.

Kryetari i Komunës është përgjegjës për të siguruar mbikëqyrjen e procesit të raportimit financiar të Komunës së Podujevës.

Raporti lidhur me menaxherët e projekteve thotë se:

Menaxhimi i Kontratës dhe Vlerësimi i performancës se kontraktuesve paragrafi 20.f. i Rregullës dhe Udhëzuesit Operativ për Prokurimin Publik parasheh “Të sigurojë që të gjitha regjistrat e menaxhimit të kontratës të përgatiten, mbahen dhe arkivohen në modulin për menaxhim të kontratës në sistem të prokurimit elektronik”.

Komuna e Podujevës për asnjërën nga mostrat tona menaxhimin e kontratave dhe vlerësimin e performancës se kontraktuesve nuk e ka mbajt dhe arkivuar përmes sistemit elektronik të prokurimit publik.

Kjo ka ndodhur si rezultat i neglizhencës të menaxherëve të projekteve.

Mosmbajtja dhe arkivimi i kontratave përmes sistemit të prokurimit publik mund të ndikoj në një menaxhim jo të mirëfilltë të kontratave si dhe nuk ofron mundësi e mjaftueshme që menaxhmenti të merr informata me kohë në lidhje me progresin dhe performancën e kontratave.

Kryetari duhet të kërkojë nga të gjithë menaxherët e projekteve për tu siguruar që menaxhimi i kontratave do të mbahet dhe arkivohet nga sistemi elektronik i prokurimit publik.

Menaxhmenti i Komunës së Podujevës është gjithashtu përgjegjës për përdorimin e burimeve financiare të Komunës së Podujevës në përputhje me Ligjin për Menaxhimin e Financave Publike dhe Përgjegjësinë dhe të gjitha rregullat dhe rregulloret e tjera të zbatueshme.

Kujtojmë se lidhur me raportin e Auditorit kanë reaguar edhe nga Prokuroria e Shtetit të cilët kanë thënë se: “Referuar pyetjeve tuaja,  ju njoftojmë se Prokuroria Themelore në Prishtinë ka autorizuar Policinë për grumbullimin e informatave dhe provave lidhur me këtë çështje, si dhe ka ndërmarrë veprime të tjera konform KPPRK-së, andaj në bazë të të gjeturave do të veprojë tutje”, thuhet në përgjigje nga Laureta Ulaj zyrtare për informim.