Sikur me rastin e PDK-së, as tani Bulliqi nuk e përmend koalicionin me AAK-në në Podujevë

Lirie Hoti emërohet Drejtore e Drejtorisë së Bujqësisë, Pylltarisë dhe Zhvillimit Rural, kaq i ka mjaftuar zyrës për informim për të treguar se kabinetit të Bulliqit i është shtuar edhe një anëtar por pa e precizuar se prej cilit subjekt politik vjen ky emrim.

Edhe me rastin e koalicionit me PDK-në, Shpejtim Bulliqi nuk e kishte pranuar se ka marrëveshje me subjekt politik por vetëm e disa të paknaqur.
Njëjtë u veprua edhe sot kur u bë emërimi i Lirie Hoti, pavarësisht se negociatat po zhvillohen qe disa kohë mes Bulliqit dhe AAK-së.

Në njoftimin që e ka publikuar zyra për informim thuhet se “Kryetari i Komunës, Shpejtim Bulliqi ka emëruar Lirie Hotin si Drejtore të Drejtorisë së Bujqësisë, Pylltarisë dhe Zhvillimit Rural”, pa e cekur se Luria ishte kandidate për asamble nga radhët e AAK-së.

Mirëpo asambleisti Burim Hasani ka publikuar në storen e tij në Facebook një foto nga takimi i sotëm i ores 09:00 të paraditës ku edhe u bë emërimi i znj. Hoti drejtoreshë, e ku prezent ishte edhe asambleisti tjetër i AAK-së Arbnor Fazliu dhe shefja e kabinetit të Bulliqit Edona Çitaku, mirëpo mungonte kryetari i degës së AAK-së i cili u zgjodh së fundmi, Baki Feta.

Mbetet e paqart se si do të funksionojë ky bashkëpunim mes VV-së dhe AAK-së kur as nga kabineti i Bulliqit e as nga AAK-ja nuk kanë dhënë asnjë informatë për publikun.

Kujtojmë se Shpejtim Bulliqit i duhen edhe 3 (tre) vota në asamble për të pasur shumicën.