Auditori për Komunën e Podujevës: Opinion i kualifikuar për pasqyrat financiare, ka keq menaxhim të financave

Është publikuar raporti për pasqyrat financiare vjetore të Komunës së Podujevës për vitin 2022, njofton PodujevaPRESS.net

Sipas raportit këtë vit auditori ka bërë opinion të kualifikuar, që i bije se ka keq menaxhim të financave publike.

Raporti thot se:

“Nga testimi i mostrave ka rezultuar se ishin bërë keqklasifikim të shpenzimeve në kategoritë e ndryshme ekonomike në vlerë 672,897€.

Komuna kishte bërë pagesë nga kodi ekonomik objekte shëndetësore bazuar vetëm në marrëveshje bashkëinvestimi, pa faturë dhe raport për pranimin e punëve në vlerë 250,000€, si dhe vlera e njëjta ishte regjistruar pasuri në përdorim në SIMFK edhe pse nuk ishin përmbushur kërkesat ligjore për regjistrim.

Komuna në nenin 14.6 të Raportit Vjetor Financiar (RVF) në pjesën e hyrjes nuk kishte shpalosur lëvizjet buxhetore dhe buxhetin final sipas kërkesës së rregullores.

Pasuria jo kapitale me vlerë nën 1,000€, e prezantuar (2,045,984), në nenin 19.3.2 në Raportin Vjetor Financiar nuk është e plotë dhe e saktë pasi që komuna nuk e kishte regjistruar pasurin jokapitale në regjistrat kontabël të pasurive”.

Sipas auditorit, kryetari i Komunës është përgjegjës për përgatitjen dhe prezantimin e drejtë të Pasqyrave Financiare sipas Standardeve Ndërkombëtare të Kontabilitetit në Sektorin Publik – Raportimi Financiar bazuar në Kontabilitetin e Parasë së Gatshme. Po ashtu, Kryetari i Komunës është përgjegjës edhe për vendosjen e kontrolleve të brendshme, të cilat i përcakton si të nevojshme për të mundësuar përgatitjen e Pasqyrave Financiare, pa keq deklarime materiale të shkaktuara, qoftë nga mashtrimi apo gabimi. Kjo përfshinë përmbushjen e kërkesave që burojnë nga Ligji nr. 03/L-048 për Menaxhimin e Financave Publike dhe Përgjegjësitë dhe Rregullorja nr. 01/2017 për Raportim Vjetor Financiar nga Organizata Buxhetore.

Kryetari i Komunës është përgjegjës për të siguruar mbikëqyrjen e procesit të raportimit financiar të Komunës së Podujevës.

Menaxhmenti i Komunës së Podujevës është gjithashtu përgjegjës për përdorimin e burimeve financiare të Komunës së Podujevës në përputhje me Ligjin për Menaxhimin e Financave Publike dhe Përgjegjësinë dhe të gjitha rregullat dhe rregulloret e tjera të zbatueshme.