115 km largësi, komuna e Podujevës i jep tender kompanisë nga Prizreni për pastrimin e makinave zyrtare

Zyrtarët e Komunës së Podujevës do të bëjnë 115 kilometra rrugë për të pastruar veturat e tyre, pasi që komuna në fjalë i ka dhënë tender një kompanie nga Prizrenit për të pastruar këto vetura.

Bëhet fjalë për kompaninë GeoGrup Ing Sh.P.K. me seli në Sërbicë të Poshtëm të Prizrenit, ku zyrtarët duhet të udhëtojnë 115 kilometra për të pastruar makinat e tyre.

Gazeta Nacionale ka tentuar të kontaktoj me kompaninë në fjalë, respektivisht me drejtorin menaxhues, Jetmir Mustafa, mirëpo i njëjti nuk e ka hapur telefonin.

Në Agjencinë për Regjistrimin e Bizneseve, kompania GeoGrup Ing Sh.P.K del të jetë e specializuar për ndërtimin e rrugëve dhe autostradave, ndërtimin e projekteve të tubacioneve dhe kanalizimeve.

Në ARBK kjo kompani ka një mori veprimtarish, mirëpo aty figuron që ka vetëm dy punëtorë.

Gazeta Nacionale ka kontaktuar edhe me Komunën e Podujevës për të marrë një përgjigje rreth këtij tenderi, mirëpo deri në publikimin e këtij artikulli të njëjtit nuk kanë kthyer përgjigje.

Kompania GeoGrup Ing Sh.P.K është emër i njohur për redaksinë e Nacionales.

Kjo kompani është përzgjedhur edhe për një tender tjetër nga Komuna e Podujevës, dhe bëhet fjalë për furnizim me pemë dhe perime për dy çerdhe publike në këtë komunë.

Më të hapur ky tender, komuna kishte parashikuar çmimin 2 mijë e 200 euro, ndërsa kompania në fjalë ka rrëmbyer nga buxheti i komunës së Bulliqit 1 mijë e 748 euro më shumë, pasi që çmimi fitues është 3 mijë e 948 euro.

Në atë kohë nga kompania kishin dhënë përgjigje për Nacionale, ku Gazmend Hoti, menaxher i kësaj kompanie kishte thënë se të dhënat në ARBK janë nga e kaluara.

“Ato aktivitet na kanë mbetur nga e kaluara, se ne realisht mëremi me tregti. Kemi mbetur ende pa i ndryshuar dhe jemi në proces në ndryshimin e tyre ne ARBK. Ne i kemi edhe të tjerat aty të paraqitura.” – ka thënë Hoti.

Ndërsa për çmimin e tenderit, pasi që kompania e kishte fituar dyfish më shtrenjtë nga ajo që ishte parashikuar, Hoti ka thënë se krejt kjo ka ndodhur për shkak të inflacionit.

“Inflacioni ka ndiku me qenë çmimi kaq i lartë.” – ka përfunduar ai.

Nacionale i ishte drejtuar edhe komunës së Bulliqit për të pyetur rreth këtij tenderit.

Nga komuna kanë thënë për Nacionalen se kompania në fjalë i ka përmbushur kriteret e kërkuara.

“Në tenderin për furnizimin me pemë dhe perime për dy çerdhet publike ka aplikuar vetëm kompania në fjalë, por siç mund të shihni edhe në ARBK kjo kompani merret me shumë veprimtari e njëra ndër to është edhe tregtia me shumicë e frutave dhe perimeve. Përderisa kjo kompani i ka plotësuar kriteret e kërkuara dhe siç shihet edhe në certifikatën e biznesit merret edhe me këtë veprimtari, si dhe është kompania e vetme që ka aplikuar për këtë tender.” – thuhet në përgjigjen e komunës.

Ndërsa sa i përket çmimit të planifikuar dhe atij fitues, nga Komuna e Podujevës kanë thënë se arsyeje është rritja e çmimeve në treg, dhe sipas tyre janë detyruar për shkak të dështimit të disa hershëm të këtij projekti.

“Kur është bërë planifikimi i mjeteve kanë qenë të tjera çmime, andaj janë planifikuar 2 mijë euro, por ngritja e çmimeve në treg ka ndikuar të rritet edhe çmimi i ofertuesit. Një arsye shtesë që ka ndikuar për lidhjen e kësaj kontratës me këtë ofertë ka qenë edhe dështimi i disa hershëm i këtij projekti dhe kanë mbetur çerdhet pa u furnizuar me këto produkte.” – thuhet ndër të tjera në përgjigjet e Komunës së Podujevës.