LDK e akuzon Bulliqin për punësime partiake, kurse ky u thotë se komuna është e mbushur me anëtarë të LDK-së

Raportimi në Kuvendin Komunal i kryetarit të Podujevës për punën njëvjeçare të qeverisjes së tij u përcoll të premten me akuza e kundërakuza. Përderisa kryetari Shpejtim Bulliqi i përmendi si suksese projektet e realizuara gjatë vitit të shkuar, këshilltarët opozitarë ia numëruan punësimet partiake mes dështimeve të qeverisjes.

Akuzave për punësime partiake Bulliqi iu përgjigj me kundërakuzë ndaj LDK-së.

“S’kemi familjarë. Nëse thoni partiake, djem më së paku keni të drejtë ju me akuzua për partiake. Nja 260 a sa i kam në komunë, nja 240 janë të LDK-së, bile me libreza. A e keni parë sa herë të keni tubime sikur delet krejt vijnë në tubime tuaja atje. Unë po ju kallxoj. Jo, qysh nuk ka pasë Vetëvendosje. Prej 2006 ka pasë Vetëvendosje”, u shpreh Bulliqi.