Dyshohet se kryen vjedhje, arrestohen pas disa ditësh në arrati tre të rinj në Podujevë

Një fenomen mjaft shqetësues për qytetarët e Kosovës janë bërë vjedhjet e shpeshta nëpër shtëpi, biznese e institucione financiare që po shkaktojnë humbje e pasiguri. Hajnat në të shumtën e rasteve arrijnë që të ikin nga duart e organeve të rendit, por ka të atillë që kapen pas veprimeve hetimore të Policisë, raporton Gazeta Sinjali.

Kështu ka ndodhur së fundi në fshatin Sibofc të Podujevës, ku tre të rinj dyshohet se janë përfshirë në një vjedhje që kishte ndodhur në Ditën e Pavarësisë, më 17 shkurt.

Burimet e Gazetës Sinjali kanë bërë me dije se të dyshuarit janë identifikuar gati dy javë më pas dhe të njëjtit janë shoqëruar në stacion policor ku janë intervistuar lidhur me rastin.

Sinjali mëson se të dyshuarit janë të moshave 17, 20 dhe 24-vjeç.

Pas përfundimit të procedurave policore, Prokurori i Shtetit ka nxjerrë aktvendim që të dyshuarit të dërgohen në mbajtje dhe ata të hetohen nën dyshimet për kryerjen e veprës penale ‘Vjedhje grabitqare’.