Zyrtari i Ministrisë së Infrastrukturës rrezikon të përfundojë në burg për 500 € ryshfet

Shukri Shabani, zyrtar i Ministrisë së Planifkimit dhe Infrastrukturës, është arrestuar dje në kuadër të aksionit “Brezovica”.

Shabani, i cili ushtronte detyrën si Kryetar i Komisionit për Vlerësimin e Ndikimit në Mjedis në Ministrinë e Mjedisit, pretendohet se ka kryer veprën penale “Marrje e Ryshfetit”.

Ai në vitin 2019 dyshohet se kishte kërkuar 500 euro nga biznesmeni Fatmir Grainca për vlerësimin e ndikimit në mjedis, pasi ky i fundit ishte duke ndërtuar një kompleks prej 18 objekteve, e të cilat ishin në kundërshtim me Ligjin mbi Ndërtimin.

“Ekziston dyshimi i bazuar se në vitin 2019, si person zyrtar-kryetar i Komisiont për Vlerësimin e Ndikimit në Mjedis, në Ministrinë e Mjedisit dhe Planifikimit Hapësinor (MMPH) ka pranuar para e qëllim që të veproje në kundërshtim me detyrat e tij zyrtare, në atë mënyrë ka kërkuar dhe ka marr 500 euro nga i pandehuri Fatmir Grainca”, thuhet në dosjen e Prokurorisë.

Veprimet dyshohet se i kishte ndërmarrë me qëllim që të bëjë vlerësimin se “nuk ka nevojë për vlerësimin e ndikimit në mjedis, edhe pse i pandehuri ishte duke ndërtuar një kompleks të vilave prej 18 objekteve, të cilat ishin duke u ndërtuar në kundërshtim me Ligjin mbi Ndërtimin”.

Marrja e ryshfetit, bazuar në Kodin Penal të Kosovës, dënohet me gjobë dhe me burgim prej gjashtë muaj deri në pesë vjet.

Paparaci raportoi dje se Shukri Shabani, zyrtar i shërbimit civil në Ministrinë e Infrastrukturës, ndodhet në mesin e shtatë personave të cilët janë arrestuar dje në rastin e njohur “Brezovica”.

Shtatë persona janë arrestuar mëngjesin e së mërkurës në kuadër të aksionit “Brezovica”, të zhvilluar nga Prokuroria e Ferizajt.

Aksioni është zhvilluar në tri lokacione: Prishtinë, Podujevë dhe Fushë Kosovë. /Paparaci.com