Zvarritet për 15 vjet funksionalizimi i pushimores në Orllan

Objekti milionësh që ishte paraparë për fëmijët jetimë në fshatin Orllan të Podujevës ka mbetur i pashfrytëzuar që prej ndërtimit të tij para 15 vjetëve. Megjithëse Komuna nuk ka arritur ta funksionalizojë, këtë nuk ka mundur ta japë as në shfrytëzim. Efekt nuk ka pasur as ulja e çmimit për metër katror nga 3 në 1 euro.

Për përfaqësuesin i rrjetit të OJQ-ve “Demokracia Fillon Këtu”, Shemsi Jashari, Komuna e Podujevës ka problem serioz me menaxhimin e pronave publike. Sipas tij, për mosfunksionalizimin e kësaj pushimoreje fillimisht kanë ndikuar raportet jo të mira ndërmjet udhëheqësve të Komunës dhe shoqatave të dala nga lufta, transmeton KOHA.

“Dhe kur flasim për kohën e tashme është mungesë e një strategjie për zhvillim ekonomik lokal të zonës së Orllanit dhe asnjë investitor serioz nuk do të vinte të fillonte një biznes, të fillonte një aktivitet në një vend ku nuk e ka vëmendjen e pushtetit lokal, nuk ka investime të planifikuara, edhe pse si zonë turistike do të mund të shfrytëzoheshin shumë ato resurse, si uji, natyra, pyjet, për shumë aktivitete rekreative, komuna nuk e ka një plan të qartë dhe si rezultat i kësaj edhe ka ndodhë që ky objekt vetëm të shpenzojë duke paguar punëtorë për të siguruar objektin dhe të mos ketë të hyra në adresë të komunës”, ka thënë Shemsi Jashari.

Sipas tij, Komuna nuk duhet të fokusohet shumë për të hyrat se sa merr nga qiraja, por të bëjë një plan të qartë të veprimit që do të nxiste zhvillimin ekonomik lokal dhe punësimin e asaj pjese.

“Po ashtu ky objekt mund të shfrytëzohet edhe për disa shërbime komunale që t’ua lehtësojë dhe t’ua mundësojë qytetarëve të asaj pjese. Ne e dimë që atje bashkësia lokale e ka një zyrë për çështje të dokumentacionit bazik që shërbehet, por do të mund të shfrytëzohej sidomos nga Drejtoria e Bujqësisë, të bënte një zyrë atje, ku do t’i nxiste fermerët që të aplikojnë për grante e subvencione, t’i këshillonte ata, të mbante seminare pune dhe në përgjithësi ta bënte një aktivitet që do ta nxiste edhe kthimin e banorëve që janë zhvendosur, por edhe të atyre aktualë që qëndrojnë në këtë pjesë”, ka theksuar përfaqësuesi i DFK-së.

Ndërsa këshilltarja nga radhët e Lëvizjes Vetëvendosje, Lirika Maliqi, ka thënë se për shkak të mosfunksionalizimit të objektit për qëllimin që kishte, investimi po del të jetë i kotë.