Zgjerohet Kryesia Qendrore e PDK-së, 3 llapjanë pjesë e saj! (Dokument)

Partia Demokratike e Kosovës dega në Podujevë sot ka dërguar një kumtesë për media ku bëhet e ditur se nga tash Podujeva do të përfaqësohet në kryesinë qendrore të PDK-së edhe me 3 anëtarë të rinj, njofton PodujevaPRESS.

“Kryesia e degës u dha mbështetje të fuqishme anëtarëve të rinj të kryesisë të sapozgjedhur në nivelin qendror, ish komandantit te FSK – së, z. Kadri Kastrati, zëvendës Ministri Hajredin Hyseni dhe ish deputeti Latif Gashi, i cili ishte prezent dhe kishte një diskutim të gjatë dhe konstruktiv”.

Partia Demokratike e Kosovës këtë vendim e kishte marr në mbledhje e Këshillit të Përgjithshëm Drejtues të saj, e mbajtur pak ditë më par ku në mënyrë unanime u mor vendim që kryesia qendrore e PDK-së të zgjerohet, ndërsa anëtarë të rinj do të jenë: Kadri Kastrati, Latif Gashi dhe Hajredin Hyseni.

Po ashtu dega e PDK-së ka bërë thirrje që përfaqësuesit e degës së PDK-së në Podujevë të jenë të lidhur me bazën elektorale dhe t’i përvishen punës për fuqizimin e partisë dhe zbatimin e programit të saj në lehtësimin e jetës qytetare në Podujevë. /PodujevaPRESS/