Xhafaj çon para drejtësisë tre zyrtarë policie, i shkruan Çakos dhe kërkon…
Tre zyrtarë të Policisë do të përballen me ligjin për shpërdorim të detyrës në lidhje me ndërtimin pa leje në Grykën e Këlcyrës, që devijonte ujin nga ky burim natyror uji.
Me urdhër të drejtorit të Përgjithshëm të Policisë së Shtetit, Haki Çako, janë shkarkuar nga detyra shefi i komisariatit të policisë në Përmet, Gazmend Shehu, ai i Këlcyrës Edmond Anxhara, si dhe u përjashtua nga policia e shtetit, specialisti i Policisë së Zonës, Dashnor Jakupi. Ky i fundit kishte për detyrë kontrollin e territorit dhe raportimin për shkeljet e kosntatuara. Nga verifikimet që ka bërë Shërbimi i Kontrollit të Brendshëm në Ministrinë e Brendshme, ka rezultuar se inspektori Dashnor Jakupi e ka konstatuar ndërtimin pa leje në Vjosë më 5 shtator dhe as nuk e ka raportuar dhe as i është kërkuar të bëjë raportim, siç është procedura. Ndërkohë, drejtori i Policisë së Gjirokastrës dhe zv.drejtori kanë marrë vërejtje. Nisur nga kjo ngjarje, ministri i Punëve të Brendshme Fatmir Xhafaj i ka dërguar një letër drejtuesve të policisë në qarqe ku kërkon prej tyre një rikonceptim të raportit me qytetarët. Ndërsa nga Haki Cako, Xhafaj kërkon që të bëhen analiza të veçanta në të gjitha strukturat vendore për të bërë më tej reflektimet mbi mangësitë e konstatuara.
Njoftimi zyrtar i Ministrisë së Brendshme
Policia e Shtetit njofton sot se mbetet e angazhuar në përmbushjen me sukses të një sërë prioritetesh të rëndësishme si lufta kundër trafikut dhe kultivimit të drogës, krimit të organizuar, trafiqeve, kontrollit të territorit si dhe ndaj çdo shkeljeje tjetër të ligjit.
Në këtë kuadër, në fund të analizës së veprimeve dhe mos veprimeve të strukturave vendore të Policisë Gjirokastër në rastin e një ndërtimi pa leje në Grykën e Këlcyrës, në lumin Vjosë, Drejtori i Përgjithshëm i Policisë së Shtetit ka firmosur disa masa për punonjësit e Policisë, të cilët janë evidentuar me përgjegjësi administrative dhe penale.
Kështu, konstatimi i grumbullimit të materialeve dhe fillimit të punimeve në këtë vend për devijimin e një burimi natyror uji, është bërë në datë 5 shtator 2017 nga grupi i kontrollit të territorit të Postës së Policisë Këlcyrë. Megjithatë ngjarja nuk është raportuar pranë strukturave përgjegjëse, nuk u kryen veprimet procedurale dhe nuk u referua çështja në Prokurori. Drejtuesit e Drejtorisë Vendore nuk kanë ushtruar përgjegjësinë ndaj strukturave në varësi për raportimet për kontrollin e territorit. Kontrolli i territorit, në të cilin përfshihet edhe ruajtja e mjedisit nga çdo lloj krimi mjedisor është detyrë e strukturave të Policisë Vendore.
Për shkeljet dhe mangësitë e konstatuara u morën këto masa:
U shkarkua nga detyra Shefi i Komisariatit të Policisë Përmet, Kryekomisar Gazment Shehu;
U shkarkua nga detyra Shefi i Stacionit të Policisë Këlcyrë, Nënkomisar Edmond Anxhara;
U përjashtua nga Policia e Shtetit Inspektor Dashnor Jakupi, Specialist i Policisë së Zonës;
U dha ‘Vërejtje me paralajmërim’, për Zëvendësdrejtorin e Drejtorisë Vendore të Policisë Gjirokastër, Drejtues Koço Dafa;
U dha ‘Vërejtje’, për Drejtorin e Drejtorisë Vendore të Policisë Gjirokastër, Drejtues i Parë Lorenc Panganika.
Shërbimi për Çështjet e Brendshme dhe Ankesat në Ministrinë e Brendshme pas veprimeve hetimore, referoi materialet në Prokurorinë e Rrethit Gjyqësor Përmet për veprën penale të “Shpërdorimit të detyrës”, në bazë të nenit 248 të Kodit Penal për punonjësit e Policisë:
Kryekomisar Gazment Shehu, Shefi i Komisariatit të Policisë Përmet;
Nënkomisar Edmond Anxhara, Shefi i Stacionit të Policisë Këlcyrë;
Inspektor Dashnor Jakupi, Specialist i Policisë së Zonës.
Në reagim të kësaj problematike ministri i Brendshëm Fatmir Xhafaj, përmes një letre dërguar drejtuesve të Policisë së Shtetit, dënon ashpër mos reagimin e strukturave përgjegjëse në kohën e konstatimit të punimeve, duke nënvizuar nevojën për kontrollin e territorit dhe tërheq vëmendjen e strukturave vendore të policisë lidhur me përgjegjësinë ligjore që ato kanë për parandalimin, evidentimin dhe ndëshkimin e shkeljeve të ligjit, të cilat lidhen me ndërtimin në territor, si dhe me ruajtjen e mjedisit.
Ministri Xhafaj tërhoqi vëmendjen e drejtorëve të policisë së qarqeve për rikonceptimin e një marrëdhënieje të re në shërbim të qytetarëve dhe kërkoi nga Drejtori i Përgjithshëm i Policisë kryerjen e analizave të veçanta me gjithë strukturat vendore për reflektimet e duhura.
Ministri veçon suksesin mbresëlënës në kontrollin e territorit kundër kanabisit, por shpreh shqetësimin se një ndër sfidat kryesore të Policisë së Shtetit është edhe kontrolli, evidentimi i çdo ngjarje në territor, duke përfshirë këtu krimet mjedisore, sigurinë publike, ndotjet dhe ndërtimet pa leje. Ai shton se askush nuk ka imunitet për t’i shpëtuar ndëshkueshmërisë në rastin e ndërtimeve të paligjshme dhe akoma më keq, kur kryhen krime që cënojnë mjedisin, shëndetin, sigurinë apo jetën e qytetarëve.
“Mbetem personalisht i angazhuar si dhe në përmbushje të zotimeve të Qeverisë shqiptare, ashtu sikundër besoj edhe për ju, për të kërkuar ndëshkim me tolerancë zero të çdo punonjësi të Policisë, që me veprime apo mos veprime shkel ligjin, apo bëhet palë me shkelësit e tij”, shkruan ministri i Brendshëm në mesazhin e tij.
Ministria e Brendshme dhe Policia e Shtetit do të vazhdojnë me përkushtim dhe profesionalizëm, që edhe me mbështetjen e partnerëve, të përmbushin me përgjegjësi detyrat në zbatim të ligjit dhe shërbim të qytetarëve.
/Gazeta Express