Vizitorët e parkut kanë një kërkesë për Komunën e Podujevës

Komunarët e Podujevës janë kritikuar nga vizitorët për mospastrimin e Parkut të paqes “Manchaster” nga drunjtë e rrëzuar. Ata kanë thënë se janë bërë afro katër muaj prej se janë rrëzuar shumë drunj në këtë park, por që deri tash askush nuk i ka hequr nga aty. Shtatëdhjetëvjeçari Tahir Potoku, ka shprehur vullnetin që edhe vetë të marrë pjesë në pastrimin e këtij parku nëse do ta ftonte dikush.

“Me pas kush, është dashtë jo veç këta drunj që janë rrëzuar, po edhe ata tjerët që janë tharë është dashtë me i heq edhe me e pastru parkun. Këta drunj kanë mundur t’ia japin ndonjë fukaraje ose edhe shkollave, në vend se me i ble. Me pas qenë mali im nuk e kisha lënë kështu. Po na i vret sytë qysh ka mbetur kështu. 70 vjet i kam, po me më pas thirr, kisha me dalë me punu këtu edhe mos me lanë kështu parkun se nuk është në rregull”, ka thënë ai.

Edhe vizitori i rregullt i këtij parku, Sadik Zhjeqi, thotë se moslargimi e drunjve të rrëzuar po ndikon edhe në rritjen e drunjve tjerë.

“Kjo po ndodh veç për shkak të mosinteresimit të askujt. Prej që i ka rrëzuar bora e era qe gati 4 muaj, askush nuk i ka heq. Një kohë nuk kemi mundur as të ecim prej drunjve që janë rrëzuar. Pastaj i prenë veç sa me e liru rrugën. Tmerr është me i pa. Tash ka filluar edhe gjelbërimi edhe moslargimi i këtyre drunjve e pengon edhe gjelbërimin edhe rritjen e drunjve tjerë”.

Zyrtarët komunalë thonë se kanë iniciuar procedurat e prokurimit për shitjen e këtyre drunjve, por që herën e parë nuk ka pasur të interesuar. Zëdhënësi Fatri Zhitia, thotë se tash Drejtoria e Bujqësisë, Pylltarisë dhe Zhvillimit Rural i ka përsëritur këto procedura për shitjen e masës drusore.

“Drunjtë e rrëzuar te Parku i qytetit (parku te pishat) janë rrëzuar si pasojë e reshjeve dhe vërshimeve që kanë ndodhur gjatë muajit janar. Po ashtu edhe gjatë muajit mars moti i lig ka ndikuar në rrëzimin e drunjve në këtë park. Drejtoria e Bujqësisë, Pylltarisë dhe Zhvillimit Rural sipas rregulloreve dhe ligjeve në fuqi ka iniciuar procedurën në prokurim për shitjen e masës drusore të rrëzuar në Parkun te pishat, mirëpo fatkeqësisht nuk ka pasur ofertues apo të interesuar për blerjen e asaj mase drusore”, ka theksuar Fatri Zhitia. “Drejtoria e DBPZHR e ka përsëritur tenderimin për shitjen e asaj mase drusore dhe po shpresojmë që do të ketë palë të interesuara. Pra në momentin e paraqitjes së ndonjë oferte në ankandin e shpallur në Zyrën e Prokurimit ajo masë do të shitet dhe të pastrohet hapësira në park”. KOHA net

Vizitorët kërkojnë nga Komuna e Podujevës pastrimin e parkut nga drunjtë e rrëzuar