Vizat e punës në ambasadën e Gjermanisë në Prishtinë, flet ambasadori Joern Rohde

DW: Shumë qytetarë të Kosovës tashmë në rrugë  legale kanë fituar kontrata pune në Gjermani, por ata po ankohen për kohën e gjatë të pritjes për termin që të pajisen më vizë. Nëse e përjashtojmë fazën e fundit të mbylljes nga Covic-19, pse e gjithë kjo kohë duhet për tu pajisur me vizë në Ambasadën Gjermane këtu në Prishtinë?

Ambasadori Rohde: Ambasada Gjermane në Prishtinë vitin e kaluar ka lëshuar më shumë se 50.000 viza. Kjo edhe në krahasim mbarëbotëror është një shifër shumë e madhe. Në këto shifra, krahas 36.000 vizave për qëndrime afatshkurtëra, përfshihen edhe rreth 15.000 viza për qëndrime afatgjata (bashkim familjar, punësim, studime etj.). Këtu në vitet e kaluara i kemi ngritur dukshëm kapacitetet e përpunimit të kërkesave për viza. Mirëpo kërkesa edhe më tutje i tejkalon kapacitetet dhe koha e pritjes fatkeqsisht është e pamënjanueshme. Pikërisht në rastin e vizave nacionale, ne gjithëmonë jemi të varur nga puna e nevojshme shtesë e zyrave kompetente në Gjermani.

Lidhur me pasojat e pandemisë  COVID-19, dua të shtoj se Ambasada që nga fillimi i korrikut sërish është duke pranuar kërkesa për viza për qëndrime afatgjata (viza nacionale) për kategoritë, të cilat nuk janë të prekura nga kufizimet e udhëtimit për në Gjermani. Kërkesa për viza për fillim të punësimit sipas Rregullores së Ballkanit Perëndimor aktualisht nuk mund të pranohen. Për shkak të masave të detyrueshme shëndetësore dhe higjienike përkitazi me pandeminë, kapacitetet e zyrës së vizave – megjithë shtrirjen e kohës së pranimit të kërkesave deri në orët e mbrëmjes – gjithashtu janë reduktuar dukshëm.

Rregullat e udhëtimit në BE dhe në vendet e origjininës shqyrtohen rregullisht, në bazë të situatës së pandemisë. Se kur mund të ndryshojnë ato rregulla, kjo varet nga rrjedha e situatës së pandemisë në BE dhe në shtetet e origjinës.

(Pjesë nga intervista e Ambasadori të Republikës Federale të Gjermanisë në Kosovë, Joern Rohde, dhënë Deutsche Welle-s në gjuhën shqipe).