Vetëvendosja s’e thotë asnjë fjalë për zyrtarin e saj që u kap duke ikur për Itali
Vetëvendosje nuk ka gjetur kohë të thotë as edhe një fjalë për arrestimin e Sadri Ramabajës, i cili u kap dy ditë më parë nga policia në Durrës nga ku po e synonte ikjen për në Itali. Ky subjekt politik zakonisht zgjedh heshtjen karshi skandaleve të anëtarëve të saj, por janë të shpejtë në reagimin e akuzave ndaj kundërshtarëve politikë.
Zyrtarët e Vetëvendosjes njihen për reagime dhe për diskreditim publik të kundërshtarëve politikë por nuk flasin kur anëtari i tyre dyshohet për përgatitje të vrasjeve të udhëheqësve të shtetit. VV akuzon partitë e tjera për krim e korrupsion por në përbërje të saj ndodhen njerëz që akuzohen për terrorizëm, përdorim të armës apo mjetit të rrezikshëm dhe pengim i personit zyrtar gjatë kryerjes së detyrës zyrtare.
Ish-kandidatit të VV-së për deputet dhe asamblist i saj në Komunën e Prishtinës, Sadri Ramabajës, sot i është caktuar masa e paraburgimit prej 30 ditësh, i cili po akuzohet nga Prokuroria Speciale për përgatitje të vrasjeve të përfaqësuesve të lartë të Republikës së Kosovës.
Ndaj heshtjes së VV-së ka reaguar Azem Vllasi, i cili ishte plagosur nga Murat Jashari, pjesëtar i “Syrit të Popullit”, dhe bashkëpunëtor i Sadri Ramabajës.
Sipas tij, heshtja e VV-së nuk është aspak e arsyeshme duke marrë parasysh që shumë anëtarë të saj po dalin të jenë të përfshirë në këto akte kriminale.
“Më së miri është që këta të Lëvizjes Vetëvendosje të dalin, mbasi aq shumë njerëz të kësaj partie të përfshirë në këtë organizatën terroriste “Syri i popullit”, duhet të deklarohen, të sqarohen. Unë nuk besoj se heshtja e VV-së për aq shumë njerëz të tyre të involvuar për këto akte kriminale nuk i bën nder apo përfitime politike në opinion nëse vazhdon të heshtë”, ka thënë Vllasi. /Gazeta Express