Veliu: Taksa të hiqet ashtu siç po kërkojnë miqtë tanë amerikanë
Nëse Vetëvendosja dhe Lidhja Demokratike e Kosovës nuk arrijnë një marrëveshje rreth heqjes së taksës 100 për qind dhe mosvendosjen e reciprocitetit në asnjë mënyrë, atëherë zëvendëskryeministri Avdullah Hoti ka konfirmuar ditë më parë se do të largohet nga Qeveria Kurti
Përçarja për taksën mes koalicionit VV-LDK ka bërë që zyrtarët e dy partive të përplasen mes vete me qëndrime të kundërta, LDK-ja është pro heqjes dhe ruajtjes së partneritetit me SHBA-në, kurse VV-ja të shtojë masën e reciprocitetit.
Ndaj kësaj ka reaguar edhe nënkryetari i Lidhjes Demokratike të Kosovës, dhe njëherësh ministër i Punëve të Brendshme, Agim Veliu.
Veliu ka dalë kundër propozimit të “shefit” të tij, kryeministrit Albin Kurti, për taksën 100 % ndaj mallrave serbe dhe se kjo taksë duhet të hiqet sa më parë.
“Ne si LDK e kemi dhënë qëndrimin tonë zyrtar. Pra, edhe unë jam që taksa të hiqet ashtu siç po e kërkojnë edhe miqtë tanë ndërkombëtarë- në këtë rast amerikanët, që taksa të hiqet e tëra”, tha Veliu për Gazetën Blic.
Veliu ka porositur, po ashtu, Kurtin që marrëdhënia me SHBA-në të ruhet dhe të dëgjohen kërkesat e tyre në lidhje me taksën dhe dialogun me Serbinë.
Po ashtu, ai ka paralajmëruar se struktura dhe kryesia e LDK-së shumë shpejt do të mblidhet për marrjen e vendimeve të tjera në lidhje me taksën nëse ajo nuk hiqet.
