Veliu: LDK-ja nuk bën koalicion me Vetëvendosjen sepse janë të majtë
Lidhja Demokratike e Kosovës nuk do të bëjë koalicion me Lëvizjen Vetëvendosje pasiqë kjo e fundit nuk është parti e djathtë.
Kështu ka thënë nënkryetari i Lidhjes Demokratike të Kosovës, Agim Veliu, pasi është pyetur nga gazetarët për mundësinë e koalicionit me këtë subjekt politik.
Këto komente ai i bëri, në konferencën për media, ku u prezantua kandidati për kryeministër nga radhët e kësaj partie, Avdullah Hoti
Kryetari i Lidhjes Demokratike të Kosovës, Isa Mustafa, sot e ka bërë të ditur se Avdullah Hoti do të jetë kandidat për kryeministër nga radhët e kësaj partie.
Në një konferencë për media, pas takimit të Kryesisë të Partisë, Mustafa tha se Lutfi Haziri dhe Agim Veliu nuk janë kandiduar për kryeministër, pasi nuk kanë dashur të shkaktojnë zgjedhje të parakohshme lokale.
“Ata edhe më tej do të vazhdojnë të jenë kryetar komunash, ndërsa Avdullah Hoti do të jetë kandidat për kryeministër”, tha Mustafa.
Në media u raportua disa ditë radhazi se Lutfi Haziri do të jetë kandidat i LDK-së për kryeministër.
Ndërkohë, sa u përket koalicioneve parazgjedhore, kreu i LDK-së tha se partia e tij ka saktësuar disa parti tjera, por që ende nuk kanë vendosur përfundimisht se cilat do të jenë partitë që LDK-ja do të bëjë koalicion.
