“Veç mund ta bllokosh veten”: Sarrazin i thotë Kurtit se mund të vazhdojnë edhe pa Kosovën në CEFTA

Manuel Sarrazin, i dërguar i Gjermanisë për Ballkanin Perëndimor, ka folur me “letra çel” në lidhje me pakënaqësitë me Qeverinë e Kosovës për CEFTA-n. Në një intervistë për Kohën, Sarrazin i ka dërguar një mesazh të qartë Qeverisë së Kosovës, duke thënë se “veç mund ta bllokosh veten”.

Tutje, Sarrazin ka thënë se “duhet t’ia shpjegoj këtu Qeverisë së Kosovës” se në lidhje me tregun e përbashkët, do të vazhdojnë “edhe pa Kosovën nëse ësthë e domosdoshme”.

“Tash ne kemi parimin kryesor në Bashkimin Evropian dhe tash veç mund ta bllokosh veten dhe më duhet t’ia shpjegoj këtu Qeverisë së Kosovës se do të vazhdojmë me marrëveshje për këto çështje, lidhur me tregun e lirë të përbashkët, edhe pa Kosovën nëse është e domosdoshme. Ky është mesazhi im i sotëm” – ka thënë ai.

Në lidhje me refuzimin e Kurtit ka folur sot edhe ambasadori i Gjermanisë në Kosovë, Jorn Rohde, i cili zbuloi se kryeministri kosovar refuzoi një kompromis të propozuar nga Sarrazin rreth CEFTA-s, e cila parashihte që UNMIK të zëvendësohet me Kosovën në bord.

“Manuel Sarrazin vizitoi Kosovën sërish për të nxitur Albin Kurtin që të bëjë kompromis për CEFTA-n, duke mundësuar liritë kryesore për qytetarët e Kosovës, duke zëvendësuar UNMIK-un me Kosovën në bord – pa sukses. Nëse është e nevojshme, vendet e tjera të Ballkanit Perëndimor do të vazhdojnë pa Kosovën, tani për tani, për të vazhduar me bashkëpunimin rajonal dhe Procesin e Berlinit.” – ka shkruar ai.

🇩🇪@ManuelSarrazin visited 🇽🇰 again to urge @albinkurti to compromise on CEFTA, enabling key freedoms for 🇽🇰 citizens, replacing UNMIK by 🇽🇰 on the board – unsuccessfully.

If needed, the other WEB countries will move on w/o 🇽🇰 for now, to go ahead w/ regional coop + Berlin Process pic.twitter.com/JetbpfRchb

— Ambassador Jörn Rohde (@GermanAmbKOS) September 5, 2024

Siç kishte raportuar Nacionale para një jave, Sarrazin para mediave kishte deklaruar që duhen rezultate konkrete para tetorit kur pritet të mbahet Samiti i Procesit të Berlinit.

“Ne duam të bëjmë një kapërcim ambicioz në tetor në Berlin. Sot isha në Prishtin dhe tash udhëtoj në rajon për të përgatitur rezultate konkrete në rajon, që të ecim para, për jetët e njerëzve.

Por, për këtë na duhet kompromis dhe nganjëherë edhe gatishmërinë për të bërë lëshime për t’u pajtuar në ujdi politike që nuk janë të lehta për Serbinë dhe as të lehta për Kosovën.” – kishte thënë ai, transmeton Nacionale.

Në lidhje me reagimin e gjermanëve ka shkruar këshilltar i Kurtit, Jeton Zulfaj. Në një status në profiling e tij në Facebook, Zulfaj ka shkruar se Serbia e ka kushtëzuar kompromisin rreth CEFTA-s me “me heqjen e masave të sigurisë së Kosovës në pikat kufitare me Serbinë”.

“Kryeministri i Republikës së Kosovës, Albin Kurti është takuar sot me Përfaqësuesin Special të Gjermanisë, Manuel Sarrazin për të diskutuar mbi mundësitë e zhbllokimit të vendimmarrjes në CEFTA.

Pas tre vitesh bllokadë të Serbisë brenda CEFTA-s, kemi një zgjidhje kompromisi.

Serbia tash e ka kushtëzuar këtë zgjidhje me heqjen e masave të sigurisë së Kosovës në pikat kufitare me Serbinë. Këto dy çështje nuk janë të ndërlidhura.

Masat e Kosovës nuk kanë të bëjnë me tregtinë, por rrjedhin nga kërcënimet ndaj sigurisë së shtetit tonë.

Ato nuk janë marrë nga Ministria e Tregtisë, por nga autoritetet tona të sigurisë” – ka shkruar ai.