Vdes gjenerali Jackson, komandanti i NATO-s që parandaloi spastrimin etnik në ’99-tën

Mike Jackson ushtaraku i lartë britanik në rangun e gjeneralit, i cili në vitin 1999 kishte komanduar trupat e NATO’s që po hynin në Kosovë, pas 78 ditësh bombardimesh ndaj caqeve serbe, ka vdekur të martën.

Jackson,  i cili paraprakisht po atë vit,në emër të NATO’s, ka negociuar  me ushtarakët serbë kapitullimin e Jugosllavisë në Kumanovë, ka shërbyer në Kosovë për 4 muaj.

Jackson i cili më vonë ishte promovuar si shef i shtabit të ushtrisë së Mbretërisë së Bashkuar,  ishte bërë lajm ndërkombëtar më 12 qershor të vitit 1999, kur kishte refuzuar urdhrin e Wesley Clark Komandantit të Forcave të NATO’s për Evropë, për t’i sulmuar trupat ruse të cilat ishin vendosur në Aeroportin e Prishtinës. “Nuk do ta nis Luftën e Tretë Botërore” raportohet t’i ketë thënë atë kohë Jackson Clarkut.

Gjenerali i famshëm britanik, gjatë shërbimit në Kosovë kishte negociuar demilitarizimin e UÇK’së, nga e cila kishin dalë Trupat e Mbrojtjes së Kosovës.

Në një reagim, Ambasada Britanike në Prishtinë ka shprehur keqardhje për vdekjen e gjeneralit Sir Mike Jackson.

Ambasada Britanike po ashtu ka publikuar biografinë e gjeneralit Jackson.