Vazhdojnë përplasjet rreth ndërtimit të xhamisë në Prishtinë!

Deklarata e myftiut të Kosovës, Naim Tërnava se nëse nuk u jepet leja për ndërtimin e xhamisë së paraparë prej shumë vitesh në Dardani, Bashkësia Islame do të fillojë ndërtimin qoftë edhe pa leje, ka ngjallur reagime të shumta.

Pak ditë pas kësaj deklarate, ka nisur edhe një peticion i shoqërisë civile, i cili është kundër ndërtimit të xhamisë me projektin ekzistues, pasiqë sipas tyre, ky projekt nuk përkon me rregullimin urbanistik të lagjes.

Inicuesi i peticionit, Yll Rugova, i ka thënë Periskopit se ky grup i shoqërisë civile nuk është kundër ndërtimit të xhamisë, por se është kundër projektit ekzistues aktual.

“Problemi kryesor qëndron në faktin se ky projekt nuk është në përputhje me kriteret e vetë konkursit që e ka shpallur Bashkësia Islame e Kosovës e gjithsesi nukë shtë në përpudhje as me planin me rregullues të lagjes Dardania dhe është miratuar që nga viti 2009 në atë lagje”, thotë Yll Rugova për Periskopin.

Kundër Rugovës është zëdhënësi i BIK’ut, Ahmet Sadriu, i cili thotë se konkursi ka qenë transparent dhe se atë e kanë përkrahur rreth 14 mijë qytetarë.

“Një konkurs që ka qenë konkurs transparent, i cili ka qenë konkurs internacional ku kanë konkuru një numër i madh projektues i kompanive vendore dhe të jashtme”, ka thënë Sadriu për Periskopin.

Yll Rugova thotë se projekti aktual që është fitues në bazë të kritereve të Bashkësisë Islame të Kosovës, paraqet një xhami e cila nuk është origjinale, por e ka kopjen e saj në Turqi.

“Kjo xhami nuk është origjinale, por është kopje e një projekti tjetër në Turqi, që ka qenë një nga kriteret kyqe në konkurs e poashtu nuk është në stilin arkitektonik që përputhet me ambientin përreth”, ka thënë Rugova për Periskopin.

Këto deklarime, Ahmet Sadriu i quan ‘pollavra’. Thotë se në Kosovë vazhdimisht kërkohet diçka tradicionale, ashtu edhe si është paraparë të ndërtohet xhamia, e në anën tjetër, i quan tendencioze deklaratat e përfaqësuesve të shoqërisë civile.

“Janë ma shumë me thanë, mos me thënë pollavra, apo janë tendencioze dhe nuk kanë bazë sepse ne e kemi zgjedhë një arqitekturë që është prezente dhe praktikuese në territorin e kosovës dhe të ballkanit”, ka thënë Sadriu për Periskopin.

Për Yll Rugovën, zgjidhja e këtij problem do të ishte shumë e thjeshtë: vetëm që gjithçka të kryhet konform ligjeve në fuqi. Në anën tjetër, zëdhënësi i BIK’ut Ahmet Sadriu, thotë se ai qëndron prapa deklarimeve të myftit Tërnava, që xhamia do të ndërtohet qoftë edhe pa leje.

“Përndryshe myftiu është deklaru dhe ne do të detyrohemi, prapë po e përsëris do të detyrohemi përkundër vullnetit tonë dhe dëshirës tonë që të fillojmë me ndërtimin” ka thënë Sadriu për Periskopin.

Ndryshe, Komuna e Prishtinës ka paralajmëruar debat në kuvendin komunal lidhur me ndërtimin e xhamisë më 21 korrik.

Bashkësia Islame e Kosovës, i ka bërë apel Komunës që t’ua gjejë një zgjidhje konform kërkesës së tyre, në të kundërtën, thonë se janë të vendosur të veprojnë edhe pa marrë leje nga komuna.

Lidhur me rastin ka pasur reagime të shumta deri tash.

Kryetari i Komunës së Prishtinës, Shpend Ahmeti, ka thënë se xhamia do të ndërtohet, por se kjo do të bëhet konform ligjit. Ka pasur edhe reagime nga ana e partive politike, derisa rasti, është konsideruar se po politizohet tej mase, sidomos me inkuadrimin në debat edhe të partive politike në këtë kohë aktuale politike siç është në Kosovë.

KMDLNJ në anën tjetër, me anë të një komunikate për media ka vlerësuar se “në Kosvë janë duke u zbatuar standarde të dyfishta në lidhje me fushën e lirive fetare”.

Duke iu referuar rastit të fundit për xhaminë, KMDLNJ thotë :

Ky reagim i KMDLNJ-së vjen pas inicimit të një peticioni që kundërshton ndërtimin e xhamisë së madhe në Prishtinë si dhe mos dhënia e lejes për ndërtim.

Kjo pasi që sipas KMDLNj-së u lejua ndërtimi i Katedrales në vend të shkollës ku ishte, kisha në Llapushnik si dhe Patrikana e Pejës që ia ka devijuar edhe rrjedhën e lumit.

KMDLNj e njeh të drejtën e peticionit si njërin nga mjetet demokratike me të cilin kundërshtohet apo përkrahet një iniciativë që shkon në dëm apo dobi të qytetarëve. Me peticionin e fundit po bëhen përjashtime në baza fetare, po shkelen të drejtat e një komuniteti fetar (shqiptarë të besimit islam, turq, goranë, boshnjakë, romë, ashkalinj dhe egjiptas – qytetarë të Kosovës) duke ua mohuar të drejtën elementare të ndërtimit të objekteve të kultit edhe në rast kur nuk janë në kundërshtim me ligjin. Llogaritet se afërsisht 85% të qytetarëve të Kosovës janë të besimit islam andaj , me këtë peticion i cili nuk ka asnjë bazë ligjore, njerëzore, morale dhe logjike po i bëhet një shërbim shumë i keq raporteve të mira ndërfetare që kanë qenë deri më tani në Kosovë

Me këtë peticion po rrezikohen të drejtat e njeriut të besimtarëve të besimit islam në Kosovë pavarësisht përkatësisë etnike sikur që po inkurajohet një diskurs i rrezikshëm , ai i përçarjes në baza fetare.

Me këtë peticion po bëhet një presion ndaj autoriteteve komunale të Prishtinë që janë përgjegjëse për dhënien e lejes urbanistike për ndërtimin e xhamisë në lokacionin e ndarë nga po kjo komunë, me një kryetar tjetër.

Ky peticion nuk duhet të përfillet sepse është në kundërshtim me të drejtat e njeriut dhe të drejtat fetare të një komuniteti fetar të cilit i shkilen në mënyrë flagrante këto të drejta. Standardet e përcaktuara me ligj në fushën e të drejtave fetare, si të drejta të njeriut nuk mund të zbatohen me kritere të dyfishta duke diskriminuar një komunitet dhe duke favorizuar të tjerët. Për fat të keq në Kosovë po ndodhë zbatimi i standardeve të dyfishta edhe në fushën e të drejtave dhe lirive fetare në kohën kur po flasim për universalitetin e të drejtave të njeriut si parakusht për një shoqëri demokratike./Periskopi/