Transportuesit e udhëtarëve të Podujevës paralajmërojnë grevë në gjithë vendin

Pronarët e kompanive të transportuesve të udhëtarëve në relacionin Podujevë-Prishtinë kanë thënë se pritet që grevës së tyre t’u bashkohen të gjitha kompanitë në nivel vendi, që qëllim kanë largimin e taksistëve ilegalë. Megjithëse në Podujevë autobusët vazhdojnë të bartin udhëtarët edhe pse nga e hëna janë në grevë, kryetari i Shoqatës së transportuesve në relacionin Podujevë-Prishtinë-Podujevë, Beqir Mustafa, ka thënë se nëse greva mbahet në nivel vendi, autobusët nuk do të qarkullojnë.

Mustafa ka thënë se nesër do të mbahet takim në shoqatë dhe do të vendosin nëse do të hyjnë në grevë në gjithë Kosovën, ashtu që të kërkojnë që përmes grevave të hiqen taksitë ilegale.

Pakënaqësitë e pronarëve të 25 kompanive për bartjen e udhëtarëve Podujevë-Prishtinë kanë filluar javën e kaluar për shkak të, siç kanë thënë ata, rritjes së çmimit të peronizimit nga 2 në 3 euro për një hyrje në Stacionin e Autobusëve në Podujevë. Por, këtë e ka mohuar drejtori i Stacionit të Autobusëve, Remzi Zeneli. Ai ka thënë se kjo ka qenë si draft-marrëveshje, por që nuk është zyrtarizuar.

Zeneli tha se në takim me bordin e drejtorëve të stacionit, kryetarin e shoqatës dhe anëtarë transportues, ata e kanë lëshuar mbledhjen pa arritur një marrëveshje.

“Marrëveshja nuk iu ka dhënë askujt që ta nënshkruaj. Dhe si kundërpërgjigje e tyre na e vendosën një shkresë me çmim prej 50 centë për peronizim. Na i kemi njoftua që çmimi nuk është ngrit, nuk ka kurrfarë çmimi tjetër. 2 euro ka qenë qe 20 vjet dhe ne i pranojmë të hyjnë me 2 euro për peronizim. Laura është e hapur në hyrje, por ata nuk po iu nënshtrohen rregullave të Stacionit të Autobusëve”, tha ai.

Drejtori i Stacionit të Autobusëve ka thënë se më 24 shkurt i janë drejtuar sekretarit të përgjithshëm të Ministrisë së Infrastrukturës, Izedin Bytyçi, prej të cilit kanë kërkuar caktimin e tarifës për peronizim dhe shfrytëzim për autobusët e operatorëve privatë.

Por, Beqir Mustafa, këmbëngul se çmimi për peronizim është ngritur nga Bordi i drejtorëve të Stacionit të Autobusëve. Thotë se për shkak të pandemisë, ata e kanë caktuar një çmim prej 50 centësh në peronizim.

Kryetari i Shoqatës së transportuesve në relacionin Podujevë-Prishtinë-Podujevë thotë se kur ta sjellë Ministria çmimin, atëherë vendosin të hyjnë në Stacion të Autobusëve.

KOHA i ka pyetur edhe zyrtarët komunalë të Podujevës, por deri në kohën e raportimit nuk kanë kthyer përgjigje.