Të miturit bëhen llom mes vete në Podujevë, dy nga ta përfundojnë në ndalim policor
Përleshjet fizike në të cilat përfshihen të rinjtë janë të shpeshta në vendin tonë. Vazhdimisht raportohen raste në Polici, por edhe nga qytetarët për rrahje mes personave të ndryshëm, të cilat në shumë raste kanë përfunduar tragjikisht. Kjo është shndërruar në një dukuri shqetësuese duke u rrezikuar kështu siguria publike, raporton Gazeta Sinjali.
Në një rrahje janë përfshirë mbrëmë edhe disa të mitur në Podujevë, me ç’rast pesë persona kanë përfunduar në prangat e Policisë.
Sinjali mëson se e gjithë ngjarja ka ndodhur në sheshin e qytetit, ku pas një mosmarrëveshjeje pesë të miturit kanë eskaluar në sulm fizik ndaj njëri-tjetrit. Dy nga të dyshuarit kanë pësuar lëndime trupore, për çka edhe kanë kërkuar ndihmë mjekësore në spital.
Policia ka arritur t’i arrestojë të dyshuarit në vendin e ngjarjes dhe të njëjtit janë shoqëruar në stacion policor për intervistim.
Me urdhër të prokurorit, ndaj tyre është iniciuar rasti ‘Lëndim i lehtë trupor’, teksa dy prej të dyshuarve janë dërguar në mbajtje për 24 orë, ndërsa të tjerët janë liruar në procedurë të rregullt.