Polici goditet me veturë nga një grua që e kishte ndalur për
Si po manipulon Vetëvendosja me raportin e FBI-së për sulmin me zollë në Kuvend
Lëvizja Vetëvendosje po vazhdon ta keqpërdorë raportin e Byrosë Federale të Hetimeve (FBI), rreth rastit të sulmit terrorist në Kuvendin e Kosovës, ku dyshohet se janë të përfshirë aktivistët e saj. Me kërkesë të Prokurorisë së Kosovës, FBI-ja ka analizuar videot që kishin regjistruar kamerat e vendosura nëpër rrugët e kryeqytetit, por nuk ka mundur të vërtetojë se kush janë personat e përfshirë për shkak të cilësisë së dobët të pamjeve të regjistruara.
VV-ja dhe aktivistët e përfshirë, siç është rasti me Frashër Krasniqin, po e shfrytëzojnë këtë konstatim të FBI-së për të shpallur pafajësinë e tyre. Por, prokurori Abdurrahim Islami nuk ka asnjë dyshim se janë aktivistët e VV-së ata që e kanë kryer sulmin.
Gazeta Express e ka siguruar të plotë raportin e FBI-së, i cili nuk shpall të pafajshëm aktivistët e VV-së, por vetëm tregon se nuk ka mundësi të krahasohen pamjet e kamerave dhe fotografitë e 5 aktivistëve të VV-së. Një numër i madh i kamerave të qytetit kishin kapur qarkullimin e një motoçiklete, natën e 4 gushtit të vitit 2016, nga i cili më pas u godit me granatahedhës objekti i Kuvendit të Kosovës.
I njëjti do të përfundonte rrugëtimin e tij në lagjen “Taukbashqe”, i djegur. Motoçikleta me ngjyrë të kuqe, rreth orës 22:30, nga kamerat e sigurisë, u pa tek kalonte rrugën pranë stacionit të autobusëve në Prishtinë, për të vazhduar më pas deri tek Lagja e Spitalit, ku ngasësi i saj qëndroi për 10 minuta, për t’iu bashkuar edhe një person i dytë, që bashkë me të, me motoçikletë kishin vazhduar deri te parkingu përballë Kuvendit të Kosovës – nga ku u sulmua objekti i legjislativit me një raketahedhës dore. Sulmi ndodhi rreth orës 23:15 të asaj nate.
Gjashtë të dyshuar, vetëm 26 ditë më pas ranë në duart e Policisë së Kosovës, pas bastisjeve që u kryen në shtëpitë e tyre. Dyshimet ndaj katër prej tyre tashmë janë vërtetuar me aktakuzë, të ngritur nga prokurori i rastit, Abdurrahim Islami. Katër aktivistët e VV-së, Atdhe Arifi, Egzon Haliti, Frashër Krasniqi dhe Adea Batusha akuzohen për veprën penale që lidhen me “kryerjen e veprës terroriste”, e përkufizuar si “shkaktimi i rrezikut të përgjithshëm” në “bashkëkryerje”. Për të zbardhur fytyrat e dy personave që gjendeshin në motoçikletë atë natë, pamjet e xhiruara nga kamerat e kryeqytetit u dërguan në Drejtorinë e Teknikës Kriminalistike në Prishtinë.
Kjo e fundit nuk kishte arritur që përmes këtyre xhirimeve të bëjë identifikimin e pasagjerëve të motoçikletës. Të njëjtat, për siguri, u dërguan edhe në FBI-në amerikane, e cila doli me një raport të rezultateve të analizave të video-xhirimeve.
Por, opinioni i këtij raporti po interpretohet në dy mënyra të ndryshme, nga Prokurori i rastit, në njërën anë, dhe nga Lëvizja Vetëvendosje, në anën tjetër, aktivistët e së cilës po akuzohen për terrorizëm. Prokuroria pretendon se raporti i FBI-së qartëson se cilësia e mostrave origjinale të videove ka qenë shumë e dobët dhe nuk ka qenë e përshtatshme për të bërë krahasimin me fytyrat e personave të dyshuar.
Ndërkohë njëri nga të akuzuarit në këtë rast, Frashër Krasniqi, tash deputet i Kuvendit të Kosovës, ka shfrytëzuar daljet e tij publike për të folur për raportin e FBI-së. Sipas tij, FBI-ja nuk kishte arritur të gjente fytyrat e aktivistëve në videot e dërguara nga Prokuroria, duke thënë se kjo dëshmon pafajësinë e tyre në rastin siç e quan ai të montuar kundër tyre. Së fundi edhe deputeti i VV-së, Dardan Molliqaj, ka përmendur këtë raport edhe në foltoren e Kuvendit të Kosovës. Ai ka thënë se drejtësia, madje edhe raportet e FBI-së, tashmë kanë vërtetuar se aktivistët e Lëvizjes Vetëvendosje nuk janë fajtorë lidhur me sulmin ndaj Kuvendit të Kosovës. Gazeta Express ka siguruar raportin e plotë të FBI-së mbi analizën e video-xhirimeve dhe ka përkthyer atë në mënyrë të detajuar.
Në raport theksohet se videot e përfshira në materialet e dorëzuara janë rishikuar në mënyrë që të gjenden fushat e hetimit. Tetëmbëdhjetë video të zgjeruara janë prodhuar nga materialet e dorëzuara. Videot që përmbajnë personat në fjalë janë rishikuar për të gjetur imazhe të favorshme për ekzaminimet e krahasimit të fytyrës. Materialet e mediave të dorëzuara sipas raportit janë rishikuar dhe janë vërtetuar se përmbanin nëntë video MP4, tridhjetë video AVI dhe pesëqindetetëdhjetepesë video me pronar. Videot janë përpunuar në mënyrë elektronike, nga të cilat, janë prodhuar tetëmbëdhjetë video të zgjeruara.
Videot me përmbajtje të individëve në fjalë janë rishikuar për imazhe të përshtatshme për ekzaminime të krahasimit të fytyrës. Pjesa kryesore e këtij raporti është opinioni, sipas të cilit “nuk është gjetur asnjë imazh i personave në fjalë i përshtatshëm për të bërë analizimin e krahasimit të fytyrës, në mediat e dorëzuara”.
Prokurori i rastit, Abdurrahim Islami, ka thënë për Gazetën Express se opinionet e këtij raporti po keqinterpretohen për qëllime të caktuara, duke mos dashur t’i komentojë ato. “Është me qëllim, raporti thotë se përshtatshmëri nuk ka pasur, për shkak të cilësisë së dobët, këta po e interpretojnë në një mënyrë tjetër, kjo po shihet çka është, çdo koment i imi është i tepërt. Unë flas vetëm për aktakuzën që e kam ngritur dhe nuk ka dilema që këta persona që nga momenti i parë kanë përgatitur veprën penale dhe më vonë e kanë ekzekutuar”.
Tutje, ai ka sqaruar opinionin e FBI-së për video-xhirimet. Sipas prokurorit, cilësia e mostrave origjinale të videove nuk ka qenë e përshtatshme për kryerjen e metodës së krahasimit me fytyrat e personave të dyshuar. “Xhirimet nuk janë të përshtatshme për t’u identifikuar fotografitë e aktivistëve në to, sepse ne krahas xhirimeve i kemi dërguar edhe fotografitë e të akuzuarve, edhe ata kanë thënë se në bazë të këtyre nuk mund ta vërtetojmë sepse nuk janë të përshtatshme”, ka thënë Islami për Gazetën Express.
“Ne e kemi ditë përafërsisht sepse këtë na e ka tregu edhe Laboratori i Drejtorisë së teknikës kriminalistike në Prishtinë, e cila e ka bë një qartësim edhe ka thënë që maksimumi i këtyre pamjeve të kamerave, nuk munden më shumë, në një përqindje shumë të vogël sa që s’ka teori me u identifiku. Por ne kemi dasht të sqarojmë edhe një herë edhe për ata edhe për neve, dhe për këtë i kemi dërgu në FBI, përndryshe nuk ka të bëjë me atë çka po thonë këta. Ai është mendimi i tyre, ne e kemi këtë mendim që nuk kanë qenë të përshtatshme ato kamerat e sigurisë, është vërtetu që nuk janë të përshtatshme, sepse ato kanë qenë të lira, kah 15 euro që po i blen, edhe po i qesin nëpër vende të qytetit, po nuk kanë kualitet të lartë të imazhit”, deklaron Islami.
Ndërkohë, avokati mbrojtës i deputetit të VV-së Frashër Krasniqit, Tomë Gashi, e interpreton ndryshe këtë opinion. Ai thotë se fytyrat e të dyshuarve për terrorizëm nuk përputhen me analizat e FBI-së, me dokumentacionin që e ka dërguar Prokuroria atje, e që janë 11 video-xhirime dhe fotografitë e të dyshuarve. “Janë dërgu 12 DVD prej lokacioneve që Prokuroria i ka konsideru që kanë lëvizur aktivistët e Lëvizjes Vetëvendosje në ditën kur ka ndodhë gjuajtja apo shpërthimi në ndërtesën e Kuvendit të Kosovës. Në bazë të opinionit, në bazë të ekspertizës së FBI-së asnjëri prej tyre nuk ka mundur të identifikohet dhe është bërë identifikimi i 12 DVD-ve me materiale të shumta dhe fytyrat e tyre nuk kanë mundur të identifikohen si persona që kanë lëvizur në kohën kur ka ndodhë shpërthimi. Që i bie se edhe FBI-ja e ka vërtetuar pafajësinë e tyre”, ka thënë Gashi për Express.
Ndryshe, Prokuroria pretendon se posedon fakte se aktivistët e akuzuar të Lëvizjes Vetëvendosje kishin blerë motoçikletën më 17 korrik, mes orës 18:00 deri 19:30 në parkingun e një qendre tregtare në Prishtinë. Pronësinë e motoçikletës e kishte pranuar vetë Atdhe Arifi para Gjykatës Themelore të Prishtinës – ditën kur atij iu caktua masa prej 30 ditësh paraburgim bashkë me Egzon Halitin./GazetaExpress/